Bir ai buryn Taldyqorǵandaǵy politsiia bóliminiń bastyǵyna qatysty sot úkimi shyqqan bolatyn. Marat Kúshtibaev kabinetinde qyz zorlaǵany úshin 11 jylǵa bas bostandyǵynan aiyryldy. Orda.kz málimetinshe, Kúshtibaev áieli arqyly jábirlenýshige 40 million bermek bolǵan. Qazirgi tańda osy derek boiynsha sýdianyń hatshysyna qatysty tergeý bastalǵan, - dep habarlaidy Dalanews.kz.
Atyshýly is byltyr qarashada bolǵan edi. Joǵary shendi sheneýnik qyzdy qyzmettik kabinetinde zorlaǵan. Jábirlenýshi – Taldyqorǵannyń 27 jastaǵy turǵyny. Ol politsiia bólimine túngi ýaqytta tynyshtyqty buzǵany úshin ákelingen bolatyn. Politsiia bastyǵy jábirlenýshini kabinetine shaqyryp, artynsha intim bailanysqa túsýdi usynyp, isti jaýyp beretinin aitqan. 27 jastaǵy qyz bas tartqanymen Kúshtibaev munymen toqtap qalmaǵan.
Sot úkimi shyǵardan eki apta buryn Kúshtibaevtyń áieli Taldyqorǵandaǵy qalalyq sottaǵy hatshy arqyly kelisimge kelmek bolǵan bolyp shyqty. Olar jábirlenýshi aiǵaqtarynan bas tartsa, 40 million teńge beremiz dep ýáde etken.
Quqyq qorǵaý organdaryndaǵy derekkózder advokat pen Kúshtibaevtyń áieli sot qyzmetkerimen bul is sotqa túskenge deiin bailanysta bolǵanyn aitady. Erli-zaiypty jábirlenýshi qyzdy kórsetken aiǵaqtarynan bas tartýǵa kóndirmek bolǵan. Eger jábirlenýshi kelisken jaǵdaida eks-politsiia bastyǵy aiyppulmen nemese jarty jyl bas bostandyǵy shektelý jazasymen qutylyp keter edi.
Jábirlenýshi qyz aiǵaǵyn ózgertýge keliskendei bolady. Ol qomaqty somany 17 sáýirde alady. Tipti oǵan sotta ne dep aitý keregi de túsindirilgen. Alaida sotta jábirlenýshi qyz aiǵaqtaryn ózgertpei, zorlanǵanyn aitady. Aqshany qaitaratynyn aityp, artynsha joǵalyp ketken.
Keiinnen Kúshtibaevtyń áieli jábirlenýshi qyzdyń jigitine million teńge berip, kezdesý uiymdastyrýyn suraǵan. Alaida onyń bul isi de oryndalmai qalǵan.
Sot úkimi shyqqannan keiin Kúshtibaevtyń týystary sýdianyń hatshysynan 40 million teńgeni qaitarýyn talap etedi. Ol aqshany qaitara almai, Kúshtibaevtyń áieli politsiiaǵa aryz jazǵan. Endi Taldyqorǵandaǵy qalalyq sottyń sýdiasyna qatysty tergeý bastaldy.
