Shymkent qalasynda janarmai tasityn júk kóligi jol apatyna ushyrap, aýdarylǵannan keiin órtenip ketti. Qutqarýshylar kólik kabinasynan qaza tapqan er adamnyń denesin tapty, dep habarlaidy dalanews.kz.
Qaiǵyly oqiǵa 18 qarashada Shymkent qalasynyń Turan aýdanyndaǵy Tashkent tasjolynda bolǵan. Shymkent qalalyq Tótenshe jaǵdailar departamentiniń málimetinshe, órt týraly habar qutqarý qyzmetine saǵat 15:58-de túsken.
Oqiǵanyń qaýiptiligi eskerilip, órt sóndirý bólimsheleri kúsheitilgen shaqyrtý tártibimen jiberilgen.
Qutqarýshylar oqiǵa ornyna jetkende jol-kólik oqiǵasynan aýdarylǵan benzovozdy túgeldei jalyn sharpyǵan. Júk kóliginen jolǵa tógilgen janarmai da tutanyp, órttiń taralýyna sebep bolǵan. Órt sóndirýshiler jalyndy sóndirýge kirisip, onyń odan ári taralýyna jol bermeý úshin sharalar qabyldaǵan.
"Órt sóndirý bólimsheleri oqiǵa ornyna jetkende jol apatynan aýdarylǵan benzovoz túgeldei otqa oranǵan. Tógilgen janarmai da tutanǵan. Órt 60 sharshy metr aýmaqty sharpydy. Kólik kabinasynan qaza tapqan er adamnyń máiiti tabyldy", – dep habarlady Shymkent qalalyq Tótenshe jaǵdailar departamenti.
Órtti sóndirý jumystary barysynda qutqarýshylar júk kóliginiń kabinasynan er adamnyń máiitin anyqtaǵan. Aldyn ala aqparat boiynsha, marqum benzovozdyń júrgizýshisi bolǵan.