KSRO qulaǵaly beri bútin bir býyn almassa da Resei ózgergen joq. Ózegin órtegen ókinishi bar. Onysyn Jirinovskiidiń aýzymen aitqyzady arakidik. Ólgen imperiianyń jurtynda qalǵan jalǵyz el kelmeske ketken dáýirdi ańsaidy da turady árdaiym.
Armeniiadaǵy tolqýlardyń aýanynan seziktense kerek kezekti ret Jirinovskiidi sóiletipti Kreml.
"Bir kezderi Qyzyl imperiianyń qol astynda bolǵan memleketter Reseidiń quramyna qosylyńdar. Biz senderdi "ishki qantógisten qutqaramyz". Bul birinshi kezekte – Grýziia, Ázirbaijan, Armeniiaǵa qatysty"
– dep shatyp-butypty Jirinovskii.
Bálkim, aljyǵan adamnyń áńgimesi dersiz. Biraq bul jái Jirinovskii emes qoi. Liberaldy-demokratiialyq partiianyń jetekshisi, Memlekettik dýma depýtaty. Júieniń adamy árbirden soń.
"Armeniiadaǵy oqiǵalar bul sózsiz memlekettik tóńkeris", – deidi ol taǵy da.
Tóńkeris? Reseidiń fobiiasy. Narazylyqtyń kez-kelgen formasy Kremldiń ustanymyna qaishy. Ólerdei qorqady budan. Bilikke qarsy baǵyttalǵan kez-kelgen narazylyqty teriske shyǵarǵysy keledi Kreml. Ózgeristen ólerdei qorqady Kreml.
"Armiandar da biz siiaqty ǵoi. Olarda da jemqorlyq bar, bola da beredi, kedeishilik, basqa da máseleleri bastan asady. Qazirgi bilikti tóńkergenmen, onyń ornyna kelgender jaǵdaidy jaqsartady deisizder me? Qudai biledi, armiandar budan burynǵy bilikke zar bolyp qalýy múmkin" – deidi Kremldiń daýylpazy.
Munymen tyiylsa bir jón.
"TMD aýmaǵyndaǵy memleketterdi ishki qantógisten qutqaratyn jalǵyz el – Resei. Ýaqyt bar, oilanyńdar. Qarashańyraqqa qaityp oralyńdar óz erikterińmen. Resei Federatsiiasynda Tbilisi, Baký, Erevan, Kiev, Odessa gýberniialary paida bolýy tiis. Sonda ǵana tynyshtyq tabamyz... ", – depti Jirinovskii.
Ol Qazaqstanǵa da talai soqtyqqan. Umytshaqtyq aýrýy bar. Aitpadym deidi artynsha. Arandatty deidi.
Bir suhbatynda: "Qazaqstan meniń kishi otanym. Almatydaǵy Masanchi kóshesin meniń atyma berse qarsylyǵym joq. Men oqyǵan №25 mektepke meniń atymdy berse tipti qatyp keter edi. Men turǵan úidi murajaiǵa ainaldyrsa…Bolashaqta degenim ǵoi. Esesine sizderge týrister keledi. Bul sizderge paida" – dep bósken edi ol.
Qosanov ne deidi?
Aýzyna qaqpaq qoia almasymyz belgili onyń. Jaýap qata alamyz biraq.
Aitalyq, saiasatker Ámirjan Qosanov áleýmettik jelidegi bir jazbasynda bylai degen:
Máskeýde Jirinovskiige eskertkish qoiylypty. Soǵan qatysty bir oi.
Nege bizdiń bilik óz qolymen Jirinovskiidiń Qazaqstanǵa qatysty aitqan oilaryn dál sol stilde Reseige qatysty aita alatyn ózimizdiń «jirinovskiilerdi» qalyptastyrmaidy?
Onyń piaryna Kreml sekildi ishtei ruqsat berip otyrsa, nur ústine nur bolar edi.
Anaý esýas «Á!» dese, bizdikiler «Má!» dep otyrar edi ǵoi.
Eń bolmaǵanda, aiyzymyz qanyp otyrar edi. Resei jaǵy da oilanyp qalar edi…
Qoldan jasalǵan ári túk paidasy joq qýyrshaq partiialarǵa aqsha shyǵyndaǵansha, osylai istemei me?!”.
Ázirlegen, Dýman BYQAI
