Kezdesý memlekettik qoldaý sharalary kóbine jete qoimaityn óte kúrdeli jáne problemaly aimaq ortalyǵy Aral qalasynda ótti. Kandidat jurtshylyqpen, isker adamdarmen, kásipkerlermen kezdesti. Jiyndan negizinen ekologiiany qalpyna keltirý týraly usynys, Aral problemasy aityldy.
Bir oblystyń eki aýdanyndaǵy turǵyndardyń talap-tilegi eki bólek. Dariianyń joǵarǵy jaǵyndaǵy sharýalar kúrish sharýashylyǵyn jetkilikti mólsherde sýmen qamtamasyz etýdi surasa, ózenniń tómengi saǵasyndaǵy Aral turǵyndary men ekologtar sýdy az tutynýdy talap etedi. Sebebi sý tapshy. Teńiz tabany tartylyp barady, Araldyń ekinshi kúre tamyry Ámýdariia qurǵap ketti.
«Aýyldyq eldi mekenderdi, sondai-aq kóptegen qalany taza, sapaly aýyz sýmen qamtamasyz etý máselesi «Aýyz sý 2001-2010», «Aq bulaq 2011-2020» baǵdarlamasy boiynsha qolǵa alynǵanymen nátijesi nólge teń jobalardyń biri boldy. Júzdegen milliard biýdjettik teńge qumǵa sińgen sýdai qurdymǵa ketti. Jazalanǵan sheneýnik te joqqa tán. Men halyq qazynasyna qol salǵandardyń jazasyz ketpeitinine ýáde beremin», – dedi sailaýshylarǵa jaýabynda Jigýli Dairabaev.
Sailaýshylardyń basym bóligi óńirdiń ekologiialyq jaǵdaiyn, aýyz sý máselesin tilge tiek etip kandidattan arnaiy áleýmettik tólemderdi qarastyrýdy surady.
«Azamattardyń densaýlyǵyn saqtaý – memlekettiń basty mindetteriniń biri. Men ekologiialyq daǵdarys aimaqtary – Aral, Semei iadrolyq poligonynda turatyndar úshin jalaqy, zeinetaqy, áleýmettik járdemaqy, stipendiiany 50% - ǵa arttyratyn koeffitsient, sondai-aq bul óńirdiń adamdary úshin zeinetke shyǵýdy kem degende 5 jylǵa tómendeýdi engizemin», – dedi óz sózinde kandidat Jigýli Dairabaev.
Jalpy, bul aimaq jańa, jappai damyp kele jatqan sala – balyq sharýashylyǵyn damytýǵa qolaily óńir. Munda atalǵan sharýashylyqqa arnalǵan qarqyndy tehnologiiany damytýǵa barynsha qoldaý kórsetý óte mańyzdy. Bul aimaqta óńdeý kásiporny joqqa tán.
Mal sharýashylyǵymen ainalysatyn adamdar óz shikizatyn ótkizetin turaqty núkteleri joq. Tek joqtan basqasy bar. Qum basqan óńirdiń oty seldir bolatyndyqtan jaiylym máselesi de kúrmeýli.
«Bul turǵyda adamdardy jumyspen qamtýdy tek túie ósirýmen qamtamasyz etýge bolady. Biraq, bir átteńi, ol da aqsap tur. Jaqynda ǵana bul salaǵa memlekettik qoldaý kórsetý týraly sheshim qabyldandy. Degenmen, túie sharýashylyǵy erekshe nazar aýdarýdy qajet etedi», – dedi Jigýli Dairabaev.
Aýyl turǵyndary men aýyl sharýashylyǵy máselesiniń osyndai joǵary deńgeige kóterilgenine júrekteri jaryla qýanǵan jiynǵa qatysýshylar kandidat baǵdarlamasyna biraýyzdan qoldaý bildirdi.
