Memlekettik keńesshi Erlan Qarin «Ortalyq Aziia – Qytai: aimaqtyq áriptestiktiń jańa kókjiekteri» atty taldaý ortalyqtarynyń V forýmynyń ashylýyna qatysty. Is-sharany Qazaqstan Respýblikasy Prezidentiniń janyndaǵy Strategiialyq zertteýler institýty Qytaidyń qoǵamdyq ǵylymdar akademiiasyna qarasty Resei, Shyǵys Eýropa jáne Ortalyq Aziia institýtymen birlesip uiymdastyrdy, – dep habarlaidy Dalanews.kz
Forýmǵa Qazaqstan, Qytai, Qyrǵyzstan, Ózbekstan, Tájikstan, Túrikmenstan elderinen kelgen jetekshi taldaý ortalyqtarynyń, memlekettik qurylymdardyń, ǵylymi mekemelerdiń jáne halyqaralyq uiymdardyń ókilderi qatysty.
Alqaly jiynda sóz sóilegen Erlan Qarin kópjaqty dialogty nyǵaitýdyń mańyzyna toqtalyp, Qytai men Ortalyq Aziia elderi arasyndaǵy bailanys qarqyndy damyp kele jatqanyn aitty. Memlekettik keńesshi taiaý arada Astanada ótetin «Qytai – Ortalyq Aziia» sammitiniń ekinshi otyrysy osynyń bir dáleli ekenin atap ótti.
— Barlyq júzege asyrylǵan jáne bolashaq reformalar memlekettigimizdi nyǵaitýǵa, barsha azamattyń ál-aýqatyn arttyrýǵa baǵyttalǵan. Sondyqtan júrgizilip jatqan saiasi baǵyt salmaqty qoǵamdyq qoldaýǵa ie. Qazaqstannyń strategiialyq zertteýler institýty júrgizgen saýalnama derekterine sáikes, Qazaqstanda azamattardyń 73,3 paiyzy, al Qoǵamdyq saiasat institýtynyń deregi boiynsha azamattardyń 79,5 paiyzy elimiz durys baǵytta damyp kele jatyr dep sanaidy. Bul Qazaqstanda memleket pen qoǵam birigýiniń joǵary deńgeiin bildiredi, — dedi Erlan Qarin.
