Sheshege qarap, qyz óser degendei, anasy dáriger bolǵan eken. Armany 1986 jyly oryndalǵan. Sol jyly jai ǵana aq halatty jan bolsa, qazir abzal jan. Abzal bolyp, aialy alaqanyńmen adamdardy emdep, alǵys alý – ár dárigerdiń armany. Bul armany da oryndalǵan. Óitkeni qalyń halyqty emdep júrgenine qyryq jylǵa jýyqtapty.
Emhana men aýrýhanalarda medbike, sosyn dáriger bolyp, talai jyl qyzmet atqarǵan. «Bizdiń Qazaqstanda jedel járdemdesý, sonsoń naýqasty emdeý, emdep qana qoia salmai, ary qarai ońaltý jaǵy jaqsy jolǵa qoiylǵanyn maqtanyshpen aita alamyn», - deidi ol.
Álbette uzaq jyl tájiribe jinaǵan mamannyń qazaq halqynyń jasyn uzartý úshin tamshydai bolsyn úles qosyp kele jatqany sózsiz. «Halyq toi-tomalaqta tilek aitqanda, aqsaqaldarymyz bata bergende, densaýlyq tilep jatady. Sol densaýlyqtyń jaqsy bolýyna is júzinde úlesimdi qosyp, elden alǵys alyp jatý – men úshin úlken qýanysh deidi dáriger hanym.
Sońǵy bes jylǵa jýyq ýaqytta QR Prezidenti is Basqarmasy Meditsinalyq Ortalyǵyna qarasty «Almaty Resort» shipajaiynda direktordyń emdeý-ońaltý jónindegi orynbasary qyzmetin atqaryp keledi.
«Jumys isteý ekiniń biriniń qolynan keledi. Al súiikti jumysyńdy isteý, lázzat alýmen birdei. Jumysta ǵana emes, úsh nemeremdi de iiskep, erkeletip, lázzat alamyn» deidi Saltanat Beisembaeva.
Ózi sportty jaqsy kóredi eken. Bos ýaqytymda kitap oqimyn jáne shahmat oinaimyn deidi.
Saltanat hanymnyń aitýynsha, adamdar 85-ten asyp, 100 jasaý úshin ózine qaraý kerek.
«Qaraý degenimiz, tek ózińdi kútip qana qoimai, der kezinde skriningten ótip, profilaktikalyq em-dom qabyldap otyrǵan jón. Ol úshin bizdiń shipajaiǵa kelip, meni izdep taýyp alyńyzdar. Esigim árqashan aiqara ashyq.
Biz aýrýhanada emdelip shyqqan soń, jazylyp kettik dep oilaimyz. Shyn máninde aýrýdan tolyq aiyqqan joqsyz, mindetti túrde shipajaiǵa baryp, aǵzaǵa kúsh jinaǵan abzal.
Iaki immnýitet qalyptastyrý kerek. Áitpese belgili bir ýaqyttan keiin álgi aýrýyńyz qaita qoza bastaidy. Aldyńǵy aitqanyma qosymsha aitaiyn, aýyryp emdelgenshe, aýyrmaityn jol izde degen ǵoi, atam qazaq. Demek aldyn ala qaralyp, dárigerlerge diagnoz qoidyryp, aýrý asqynbai turǵanda basyp tastaý qajet. Uzaq jylǵy qyzmetimnen túigenim osy!» dep áńgimesin aiaqtady.
