– Kóne zamannan tarih pen rýhaniiattyń ortalyǵyna ainalǵan Ońtústik Qazaqstanda respýblika boiynsha tarihi-mádeni eskertkishterdiń 80 paiyzdan astamy ornalasqan. Sondyqtan, ólkemizde týrizm indýstriiasyn jan-jaqty damytýǵa barlyq múmkindikter bar. Búgingi kúni osy baǵytty damytý úshin 3 basymdyqqa kóńil aýdaryp otyrmyz. Birinshisi týristik infraqurylymdy damytý, onyń ishinde serpindi jobalardy júzege asyrý. Olar Túrkistan, Shardara, Saryaǵash, Qasqasý keshenderi. Ekinshisi qyzmet kórsetý sapasyn arttyrý bolsa, úshinshi basymdyq óńirdiń týristik áleýetin nasihattaý jáne jarnamalaý bolyp tabylady, – dep atap ótti ákim.
Máselen, oblysta «Qasqasý» taý-shańǵy kýrorty, «Saryaǵash» jańa kýrort qalashyǵy, Túrkistan men Otyrarda tarihi-tanymdyq týrizm kesheni, al Shardarada jaǵajai týrizmi damytylatyn bolady. Nátijesinde, 2021 jyly ishki týrizm kólemin 220 000 adamǵa jáne kirý týrizminiń kólemin 20 000 adamǵa arttyrý josparlanýda.
Sonymen birge oblysta týrizm indýstriiasynyń damýyna Elbasymen usynylǵan «Qazaqstannyń qasietti rýhani qundylyqtary», «Qazaqstannyń kieli jerleriniń geografiiasy», «Mádeni-geografiialyq beldeý» jobalary úlken úlesin qosqaly otyr.
Naqty aitqanda, «Hanqorǵan», «Sairam», «Eski shahar, Shymkent», «Kúltóbe», «Kóne Túrkistan», «Oqsyz» arnaiy baǵyttary ashylǵan jaǵdaida kóptegen jumys oryndary ashylyp, salyq kóbeiip, týristik saýda túrleri damidy.
