«Ordabasy qus» kompanıasy – Eýrazıalyq ekonomıkalyq odaqta ornalasqan eń zamanaýı keshenderdiń biri. Bul Qazaqstan men orta Azıa boıynsha birinshi jáne ázirge jalǵyz kúrketaýyq ósiretin joba bolyp tabylady. Keshende óndirilgen ónimniń 40 % Eýroodaq elderine eksporttaldy.
Kásiporynnyń endigi jospary – qospa jem shyǵarýmen aınalysatyn sharýa qojalyqtary men kásiporyndar jáne qus etin qaıta óńdeıtin kooperatıvter kiretin aımaqtyq klaster qurý. Aldaǵy ýaqytta munda aýmaǵy 50 ga quraıtyn kúrketaýyq ósiretin 25 qus qora qurylmaq. «Ordabasy qus» kúrketaýyq jemin ózi tasyp, veterınarlyq qyzmetti de ózi kórsetpek. Qus kesheni ósirilgen kúrketaýyqtardy satyp alady. Osylaısha, ósirilgen kúrketaýyqtardan 10 myń tonna qus etin óndirý josparlanýda. Klaster qurý úshin tipti jańa aýyl qurý usynylyp otyr. Ondaǵy turǵyndar joǵary tehnologıaǵa negizdelgen óndiriste jumys isteıtin bolady.
Munan soń Tımýr Qulybaev OQO Kásipkerler palatasynyń aımaqtyq keńesiniń keńeıtilgen otyrysyna qatysty. Kezdesýge oblys ákimi Janseıit Túımebaev, Ulttyq kásipkerler palatasy Basqarma Tóraǵasy Abylaı Myrzahmetov, aımaqtyq keńes músheleri, áýletti mekeme jetekshileri, bıznes-qaýymdastyqtar, bankter jáne qarjy ınstıtýttarynyń ókilderi, sonymen birge taýaróndirýshiler qatysty.
Jıynda sóz alǵan oblys ákimi Janseıit Túımebaev talqylanatyn máselelerdiń ózektiligine toqtalyp, kúngeı óńir úshin kásipkerlerdiń ekonomıkamyzǵa qosar úlesi zor ekenin aıtty.
– 2016 jyldyń qorytyndysy boıynsha ónerkásip kásiporyndarymen 776,8 mlrd. teńgeniń ónimi óndirildi. Bul kórsetkish boıynsha oblys respýblıkada 3-oryndy ıelendi. Indýstrıaldy-ınnovasıalyq damý baǵdarlamasy bastalǵaly oblys boıynsha Indýstrıalandyrý kartasy aıasynda jalpy quny 206,6 mlrd. teńge, 9,5 myń jańa jumys ornyn quraıtyn 159 joba iske qosyldy. Jalpy, Sizder qurǵan kásipkerlik nysandary bizdegi halyqtyń belsendiligi jáne óńirdiń jarqyn ınvestısıalyq múmkindikteriniń dáleli. Osyǵan oraı, búgingi otyrysta talqylanatyn máseleler, oblystyń belsendi damýyna mol úlesin qosyp bıznestiń odan ári Ońtústikte órkendeýine jol ashady dep oılaımyn, – dedi J.Túımebaev.
Otyrys barysynda ońtústikqazaqstandyq kásipkerlerdiń jıi kezdesetin máseleleri sóz boldy. Máselen, bıznesmender un shyǵaratyn óndiris oshaqtary undy nóldik mólsherde eksporttaý kezinde QQS (qosylǵan qun salyǵyn) qaıtyp berý máselesin kóterip, sýbsıdıa berý jaıy syndy birqatar problemalardy talqylady.
«Atameken» Ulttyq kásipkerler palatasy prezıdıýmynyń tóraǵasy aıtylǵan máselelerdiń barlyǵy palata otyrysynda qaralyp, másele sheshimi óz nátıjesine saı sheshim tabatynyna senim bildirdi.
Jer jáne ınfraqurylym máselesin ońtaıly sheshý maqsatynda óńirde 11 ındýstrıalyq aımaq qurylǵan. Bul óndiristik alańshalarda 170-ke jýyq joba júzege asyrylyp jatsa, onyń 66-sy qazir jumys istep tur. Sondaı-aq, toqyma klasterin damytý maqsatynda Arnaıy ekonomıkalyq aımaq qurylǵan. Qazirgi tańda onda jalpy 14 joba júzege asyrylýda, 10 joba iske qosylǵan. Al kásipkerlerge «bir tereze» qaǵıdatymen qyzmet kórsetetin «Kásipkerlerge qyzmet kórsetý» ortalyǵy jumys jasaýda. 2016 jyldyń qorytyndysy boıynsha 37232 qyzmet kórsetildi.
OQO ákiminiń baspasóz qyzmeti
