Memleket basshysynyń tapsyrmasy boiynsha QR Premer-ministriniń orynbasary Qanat Bozymbaevtyń tóraǵalyǵymen ótken Úkimettik komissiiada «Qazaqmys korporatsiiasy» JShS «Jomart» kenishindegi apatty tergeýdiń aldyn ala qorytyndylary qaraldy, dep habarlaidy Dalanews.kz.
Tergeý aiasynda 8 kishi komissiia qurylyp, ǵylymi-zertteý institýttary men zerthanalarynyń sarapshylary men mamandary da tartyldy.
Tergeý barysy týraly Tótenshe jaǵdailar, Ishki ister, Eńbek jáne halyqty áleýmettik qorǵaý ministrligi ókilderiniń baiandamalary tyńdaldy. Atap aitqanda, komissiialar men kishi komissiialardyń músheleri oqiǵany kózimen kórgen kýágerler arasynda saýalnama júrgizdi, óndiris tehnologiiasyn zerttep, tehnikalyq qurylǵylar men jabdyqtardyń jumysqa jaramdylyǵyn tekserdi, tiisti saraptamalar júrgizildi.
Komissiia taý-ken qazbasynan metannyń jinalýy men bólinýi, sodan keiin elektr jabdyqtarynyń ushqynynan jarylys bolýy siiaqty apattyń negizgi sebebin anyqtady. Sondai-aq ónerkásiptik qaýipsizdik pen eńbekti qorǵaý boiynsha aitarlyqtai ereje buzýshylyqtar anyqtalyp, jaýapty tulǵalar toby belgili boldy.
Jiynda Ulytaý oblysynyń ákimi Dastan Ryspekov pen «Qazaqmys korporatsiiasy» JShS basqarma tóraǵasy Nurahmet Nuriev apatta qaza tapqandardyń otbasylaryna áleýmettik qoldaý men kómek kórsetý jáne ótemaqy tóleý boiynsha atqarylyp jatqan sharalar týraly baiandady.
Qazirgi ýaqytta «Jomart» kenishiniń jumysy toqtatyldy. Komissiia qaýipti óndiristik obektilerde osyndai oqiǵalardyń aldyn alý sharalaryn ázirledi.
Keńes qorytyndysy boiynsha komissiia tóraǵasy Qanat Bozymbaev «Qazaqmys korporatsiiasy» JShS-ǵa buzýshylyqtardy joiý men apattardyń aldyn alý boiynsha, onyń ishinde kenishtegi qaýipsizdikti arttyrý, aýadaǵy gaz quramyn anyqtaýdyń avtomattandyrylǵan júielerin engizý, beinebaqylaý ornatý jáne basqa da birqatar tapsyrma berdi.
Tergeý jumystary jalǵasýda ári udaiy baqylaýda bolady.
