Jol mamandary tasqynǵa qarsy kúreske daiyn
Ońtústik Qazaqstan oblysynda jol salasyna qatysty mamandar qysta atqaratyn mindetterin aiaqtap, kóktemdegi sharalarǵa kirisip ketti.
Naqtyraq aitqanda, tótenshe jaǵdailardyń aldyn alý sharalaryn uiymdastyryp júrgen «Ońtústik joldary» memlekettik kommýnaldyq kásipornynyń mamandary búginde Túrkistan jáne Arys qalalary men Sozaq, Túlkibas, Ordabasy aýdandarynda jaǵdaidy qalpyna keltirip, kólikterdiń qaýipsiz yńǵaily qozǵalysyn qamtamasyz etý jumystaryn júrgizýde. Jumystardy atqarýǵa mekemeniń 100-den astam jumysshylary jumyldyrylǵan.
Atap aitsaq, «Ońtústik joldary» jumysshylary dál qazirgi tańda Sozaqtaǵy KH-57 «Sozaq-Qaraǵur-Baqyrly» avtomobil jolyndaǵy sý qubyry buzylǵan 37+900 shaqyrymyn qaita qalpyna keltirip, montajdaý jumystaryn júrgizgen bolsa, Túlkibastyń KH-69 «Tastumsyq-Jylandy-Azattyq-Shuqyrbulaq» avtomobil jolynyń 69+950–69-650 shaqyrymdaryndaǵy sý qubyrlarynda oryn alǵan tasqyn sýdy arnaiy tehnikalarmen qalpyna keltirý sharýalaryn atqaryp júr. Túrkistanda da jaǵdai osy ispettes. Onda qazirgi tańda KH-58 «Túrkistan-Baltakól-Nurtas aýyly-Shornaq-Qarnaq-Kentaý» 69+500 shaqyrym aralyqtaryn jáne KH-84 «Túrkistan-Baltakól» avtomobil jolynyń 19-26 shaqyrym aralyqtarynda tasqyn sý júrýde. Nysandaǵy búgingi ahýaldy mamandar damby salý arqyly turaqty jaǵdaida ustap otyr.
Oblystyq jolaýshylar kóligi jáne avtomobil joldary basqarmasynyń basshysy Nurlan Baiǵuttyń málimetinshe, jaýyn-shashyn basylyp, tasqyn sýdan keletin qater basylǵansha mekeme mamandarymen jaǵdai turaqty baqylaýda bolady. Al jalpy, joǵaryda atalǵan aýdan, qalalardan ózge óńirimizdiń basqa da aimaqtaryndaǵy ahýal qanaǵattarlyq.
OQO ákiminiń baspasóz qyzmeti
