DALA INSIDE insaideriniń aitýynsha, jabyq kabinettegi pikir almasýlarda eldegi konstitýtsiialyq ózgerister tolyq ornyǵyp, saiasi transformatsiia aiaqtalmaiynsha, Qairat Qojamjarovtyń júikesin qozdyra berý keri áser tigizedi degen ortaq konsensýs paida boldy. Onyń qolynda bar birneshe kompromat biyl jaryq kórmegeni abzal.
"Qojamjarovtyń senimdi serigi Maqsat Dúisenov Germaniianyń arnaiy qyzmetine bizdiń bilik tulǵalaryna qatysty birneshe qundy derek berip úlgergen. Sonyń arqasynda saiasi bostandyq aldy. Endi nemisterde de bizge yqpal ete alatyn rychagtar bar siiaqty. Osyndai qundy derekterdiń negizgi papkasy Qojamjarovtyń qolynda ekenin bizdegilerdiń barlyǵy jaqsy biledi", - deidi derekkóz.
Buǵan deiin "Ádiletti Qazaqstan" Qairat Qojamjarovqa onyń senimdi serigi, burynǵy bas kólik prokýrory Maqsat Dúisenovti elge ekstraditsiialap alyp kelý arqyly aitarlyqtai qysym kórsetpek bolǵan. Alaida, ekstraditsiia iske aspai qaldy da, onyń aldynda ázirlengen "A" jospary tolyǵymen buzyldy.
Naqty aitsaq, 2025 jyldyń qyrkúieginde Maqsat Dúisenovke Interpol jelisi arqyly halyqaralyq izdeý jariialanyp, kóp uzamai ol Germaniiada ustaldy. Sol kezde Dúisenov quqyq qorǵaýshylar arqyly saiasi baspana surap ótinish bergen. 2026 jyldyń qańtarynda Germaniia soty burynǵy prokýror Maqsat Dúisenovti bostandyqqa shyǵardy. Sot Dúisenovke qatysty qýdalaý saiasi sebepterge bailanysty bolýy múmkin degen qorytyndyǵa kelgen. Qazirgi ýaqytta ol bostandyqta júr. Qazaqstannyń ony ekstraditsiialaý týraly suranysy resmi túrde keri qaitarylǵan. Qazaqstanda oǵan 22 million dollar kóleminde para aldy, qylmystyq jolmen alynǵan tabysty zańdastyrdy jáne alaiaqtyq jasady degen aiyptar taǵylǵan bolatyn.
"Dúisenov bilýimshe Germaniiada qaldy. Sebebi endi Interpol Germaniia boiynsha ekinshi ekstraditsiia zaprosyn qabyldamaidy. Al Dúisenov basqa elge ketse, Qazaqstan tez arada Interpolǵa ótinimin qaita berýi múmkin. Dúisenov Qojamjarovpen tyǵyz bailanysta jáne eldegi quqyq qorǵaý organdarynyń ishki jańalyqtaryn tolyq bilip otyr", - deidi, derekkóz.
Qojamjarov tarapynan Qazaqstan biligine "men tynysh júremin, sender de tynysh júrińder" degen signal berilgeni anyq. Jáne ol óziniń pozitsiiasyn Maqsat Dúisenovtiń saiasi baspana alýy arqyly jaqsy kúsheitip aldy. Qazaqstannyń dál qazir bul teketiresti ýshyqtyrmai, ishki saiasi transformatsiiany tez ótkizip alýǵa aktsent berýi zańdy. Sondyqtan taraptar ýaqytsha taim-aýt alyp otyr.
