Atyraý oblysy Jylyoi aýdanynda sý tasqynynyń beti qaitpai tur, - dep habarlaidy Dalanews.kz.
Búgin Jylyoi aýdanynda sý tasqyny bolýy múmkin aimaqta turatyn halyqty habardar etý úshin dabyl sirenasy qosyldy.
"Avtobýs turǵyndardy 10 evakýatsiialyq pýnktke evakýatsiialap jatyr. Qazirgi ýaqytta 130 adam evakýatsiialandy, onyń ishinde 84 bala", - dedi Tótenshe jaǵdai departamenti ókilderi.
Vedomstvo málimetinshe, jaǵalaýdy nyǵaitý jumystary táýlik boiy júrgizilip jatyr. Jumystarǵa JAO, politsiia, áskeri bólimniń, TJD 323 qyzmetkeri, 142 tehnikasy, eriktiler men jergilikti turǵyndar arasynan 4540 adam jumyldyrylǵan.
Al jergilikti Atyraupress basylymy málimetinshe, Qulsary qalasynyń stantsiiasynan Atyraý qalasyna 5 vagonnan turatyn jolaýshylar poiyzy halyqty tegin tasymaldap jatyr. Óitkeni Jylyoi aýdanynda Jadyrasyn, Bolashaq, Qaraǵai yqshamaýdandaryn sý basyp jatyr.
"Jadyrasyn yqshamaýdanynda turǵyndar evakýatsiialanyp jatyr. Jaǵa bekitý jumystaryna 321 qyzmetker, 5 myń erikti men aýyl turǵyny, 121 tehnika jumyldyryldy, 6809 mal qaýipsiz aýmaqqa kóshirildi. Aýdanda 20 mektep onlain oqýǵa kóshti. Al 5 myń búldirshin tárbielenip jatqan 20 balabaqsha ýaqytsha jabyldy", - dep jazylǵan ákimdiktiń baspasóz habarlamasynda.
Sý tasqynynan zardap shekkender qatary saǵat saiyn artyp barady. Biri týystarynyń úiin jaǵalasa, biri aýyl mektepterin panalap jatyr. Turǵyndar uialy bailanys sapasy da nasharlaǵanyn aitady. Qazir 2 jáne 3-aýyldar qaýipti aimaqta tur.
4 sáýirden bastap Jylyoida tótenshe jaǵdai jariialanǵan bolatyn. Sý tasqyny Qulsary-Atyraý tasjolynyń bir bóligin de shaiyp ketti. Sondyqtan jol qozǵalysy tolyqtai toqtatyldy.
"1993 jyly Qulsary sýǵa ketip, myńdaǵan úi jaramsyz bolyp qalǵan edi. Ol kezde topan sýmen birge jańbyr jaýyp jaǵdaidy qiyndatyp jibergen. Biraq dál osyndai sý kelgen joq, bul ózgeshe... Úsh kún túnimen qarǵyn sýmen alysyp jatyrmyz. Negizi ákimshilik o basta tabiǵi sýdyń qaýiptiligi joq dep sendirýimen halyq qamsyz otyrdy. Sý kelip, qaýip tóne bastaǵanda iske kiristik. Alǵashqy kúnderi tehnika, qapshyq, kúrek jetispedi, janar, jaǵarmai tapshy boldy. Osy jerde myńdaǵan adam jumys istep jatsa da topan sýǵa tosqaýyl bola almai jatyrmyz. Biraq adam kúshi jetkiliksiz. Ábden jaǵdai ýshyqqasyn aýdandyq ákimshiligi mekemelerge hat jazyp, adamdarmen kómektesý jóninde hat joldady. Vahtada júrgen jigitter aqysyz kún alyp kelip jatyr", - deidi turǵyndar.
