اتىراۋ وبلىسى جىلىوي اۋدانىندا سۋ تاسقىنىنىڭ بەتى قايتپاي تۇر، - دەپ حابارلايدى Dalanews.kz.

بۇگىن جىلىوي اۋدانىندا سۋ تاسقىنى بولۋى مۇمكىن ايماقتا تۇراتىن حالىقتى حاباردار ەتۋ ءۇشىن دابىل سيرەناسى قوسىلدى.

"اۆتوبۋس تۇرعىنداردى 10 ەۆاكۋاسيالىق پۋنكتكە ەۆاكۋاسيالاپ جاتىر. قازىرگى ۋاقىتتا 130 ادام ەۆاكۋاسيالاندى، ونىڭ ىشىندە 84 بالا"، - دەدى توتەنشە جاعداي دەپارتامەنتى وكىلدەرى.

ۆەدومستۆو مالىمەتىنشە، جاعالاۋدى نىعايتۋ جۇمىستارى تاۋلىك بويى جۇرگىزىلىپ جاتىر. جۇمىستارعا جاو، پوليسيا، اسكەري ءبولىمنىڭ، تجد 323 قىزمەتكەرى، 142 تەحنيكاسى، ەرىكتىلەر مەن جەرگىلىكتى تۇرعىندار اراسىنان 4540 ادام جۇمىلدىرىلعان.

ال جەرگىلىكتى Atyraupress باسىلىمى مالىمەتىنشە، قۇلسارى قالاسىنىڭ ستانسياسىنان اتىراۋ قالاسىنا 5 ۆاگوننان تۇراتىن جولاۋشىلار پويىزى حالىقتى تەگىن تاسىمالداپ جاتىر. ويتكەنى جىلىوي اۋدانىندا جادىراسىن، بولاشاق، قاراعاي ىقشاماۋداندارىن سۋ باسىپ جاتىر. 

"جادىراسىن ىقشاماۋدانىندا تۇرعىندار ەۆاكۋاسيالانىپ جاتىر. جاعا بەكىتۋ جۇمىستارىنا 321 قىزمەتكەر، 5 مىڭ ەرىكتى مەن اۋىل تۇرعىنى، 121 تەحنيكا جۇمىلدىرىلدى، 6809 مال ءقاۋىپسىز اۋماققا كوشىرىلدى. اۋداندا 20 مەكتەپ ونلاين وقۋعا كوشتى. ال 5 مىڭ ءبۇلدىرشىن تاربيەلەنىپ جاتقان 20 بالاباقشا ۋاقىتشا جابىلدى"، - دەپ جازىلعان اكىمدىكتىڭ باسپا ءسوز حابارلاماسىندا.

سۋ تاسقىنىنان زارداپ شەككەندەر قاتارى ساعات سايىن ارتىپ بارادى. ءبىرى تۋىستارىنىڭ ءۇيىن جاعالاسا، ءبىرى اۋىل مەكتەپتەرىن پانالاپ جاتىر. تۇرعىندار ۇيالى بايلانىس ساپاسى دا ناشارلاعانىن ايتادى. ءقازىر 2 جانە 3-اۋىلدار ءقاۋىپتى ايماقتا تۇر.

4 ساۋىردەن باستاپ جىلىويدا توتەنشە جاعداي جاريالانعان بولاتىن. سۋ تاسقىنى قۇلسارى-اتىراۋ تاسجولىنىڭ ءبىر بولىگىن دە شايىپ كەتتى. سوندىقتان جول قوزعالىسى تولىقتاي توقتاتىلدى.

"1993 جىلى قۇلسارى سۋعا كەتىپ، مىڭداعان ءۇي جارامسىز بولىپ قالعان ەدى. ول كەزدە توپان سۋمەن بىرگە جاڭبىر جاۋىپ جاعدايدى قيىنداتىپ جىبەرگەن. ءبىراق ءدال وسىنداي سۋ كەلگەن جوق، بۇل وزگەشە... ءۇش كۇن تۇنىمەن قارعىن سۋمەن الىسىپ جاتىرمىز. نەگىزى اكىمشىلىك و باستا تابيعي سۋدىڭ قاۋىپتىلىگى جوق دەپ سەندىرۋىمەن حالىق قامسىز وتىردى. سۋ كەلىپ، ءقاۋىپ تونە باستاعاندا ىسكە كىرىستىك. العاشقى كۇندەرى تەحنيكا، قاپشىق، كۇرەك جەتىسپەدى، جانار، جاعارماي تاپشى بولدى. وسى جەردە مىڭداعان ادام جۇمىس ىستەپ جاتسا دا توپان سۋعا توسقاۋىل بولا الماي جاتىرمىز. ءبىراق ادام كۇشى جەتكىلىكسىز. ابدەن جاعداي ۋشىققاسىن اۋداندىق اكىمشىلىگى مەكەمەلەرگە حات جازىپ، ادامدارمەن كومەكتەسۋ جونىندە حات جولدادى. ۆاحتادا جۇرگەن جىگىتتەر اقىسىز كۇن الىپ كەلىپ جاتىر"، - دەيدى تۇرعىندار.