Májilis depýtaty Baqytjan Bazarbek jer qoinaýyn paidalaný týraly kodekske engiziletin túzetýlerde lobbistik normalar bar ekenin málimdedi, - dep habarlaidy Dalanews.kz.
Keshe Májiliste «Jer qoinaýy jáne jer qoinaýyn paidalaný týraly» kodekske túzetýler tanystyryldy.
«Jer qoinaýy týraly kodeks talqylanǵanda, bir adamǵa 200 blokqa deiin resimdeletin lobbistik norma qabyldandy. Bir blok shamamen 2 shaqyrym aýmaqty qamtidy. Sonda jer qoinaýyn paidalanýshy bir adam 200 blokqa deiin ielene alady degen sóz. Bul — paidaly qazbalardy barlaý, óndirý. Kim birinshi jetse, bar bailyq sol adamdiki. Ol osy bloktardy paidalana ma, joq pa, biraq barlyq aýmaq sonyń ieliginde bolady. Zań jobasy buǵan kedergi keltiredi dep oilap edim, biraq sizder «200 blokqa» deiin dep qaita qaldyrdyńyzdar. Nelikten bul shekti normany alyp tastaýǵa bolmaidy, sizderdi ne ustaidy? Eń bolmaǵanda 50 blokqa deiin qysqartýǵa ne kedergi?» – dedi depýtat túzetýlerdi talqylaý kezinde.
Depýtattyń aitýynsha, mundai ádispen jer qoinaýyn paidalanýshy monopoliske ainalady.
«Taǵy bir norma bar: «olar biryńǵai portaldan, memlekettik aqparattyq júielerden alynatyn bolsa, jer qoinaýyn paidalanýshylar men basqa da tulǵalardan qujattar men esepter usynýy talap etilmeidi». Zańger retinde aitaiyn: men, meniń áriptesterim aqparattyq portalǵa birneshe ret ótinish berdik, árqashan «bul — kommertsiialyq aqparat» degen bir jaýap keledi «, – dedi depýtat.
Aita keteiik, bul qujatta Memleket basshysynyń tapsyrmalaryn iske asyrý boĭynsha «Jer qoĭnaýy jáne jer qoĭnaýyn paĭdalaný týraly» kodekske ózgerister men tolyqtyrýlar engizý kózdelgen. Túzetýler aiasynda jer qoĭnaýyn paĭdalanýdyń biryńǵaĭ portaly paĭda bolady.
Bul platforma arqyly jer qoinaýyn paidalanýǵa litsenziialardy alǵashqy ótinim qaǵidaty boiynsha berý kózdeledi. Sonymen qatar, jer qoinaýyn paidalanýdyń memlekettik qoryn basqarýdyń qazirgi eki kezeńdik baǵdarlamasyn alyp tastap, aýktsiondyq júie engizý usynylyp otyr. Osy arqyly protsesterdiń ashyqtyǵy men tiimdiligin arttyrý kózdelgen.
Eske salaiyq, buǵan deiin Májilis depýtaty Baqytjan Bazarbek qurylys salasyna qatysty Qurylys kodeksi zań jobasynyń tanystyrylymynda da jaýapty organdardy ashyq synady.
«Qurylys kodeksi jańa dep bos úmitke senbeńizder! Bul jerde jańa eshteńe de joq. …Myna kodeksti 10-synyptyń oqýshysy jaza alady. 1-kýrstyń stýdentin aitpaǵanda. Bul — referat, kýrstyq jumys. Ony bizge Qurylys kodeksi retinde ákelip otyr. Bul — bar bolǵany 200 bettik aq qaǵaz. …Stilistikalyq, grammatikalyq, orfografiialyq qatelerdi aitpai-aq qoiaiyn. 3-kýrstyń stýdenti mundai qate jibermeidi», — dedi ol.
