Qazaqstandaǵy aviatsiialyq-tehnikalyq ortalyqtyń jumysy tolyq toqtaýdyń az-aq aldynda tur. Elde ushaqtar men tikushaqtarǵa tehnikalyq qyzmet kórsetetin jalǵyz kásiporynnyń bir jyldan asa ýaqyt boiy qańtarylyp turýy úlken qarjylyq shyǵyndarǵa ákelip, kásibi mamandardyń jappai shetelge ketýine túrtki boldy, dep habarlaidy Dalanews.kz.
"KTK" arnasynyń málimetinshe, buryn 180 adam eńbek etken ortalyqta qazir nebári 30 maman ǵana qalǵan. Kásiporyn basshylaryna qatysty qozǵalǵan qylmystyq is óndiristi toqyratyp, tipti angarynyń ishinde Sý-25 joiǵysh ushaqtarynyń ózi jóndeýsiz qalyp qoiǵan. Odan bólek ortalyq áskeri maqsattaǵy drondardy qurastyratyn biregei keshen sanalady, biraq olardyń da óndirisi turalap qalǵan.
Májilis depýtaty Pavel Kazantsev bul máselege alańdaýshylyq tanytyp, eldiń qorǵanys qabiletin qamtamasyz etetin mańyzdy nysannyń taǵdyryna qaýip tónip turǵanyn ashyq aitty.
"Ortalyq - elimizdiń Áýe kúshteriniń qorǵanys qabiletin qamtamasyz etý úshin asa mańyzdy ári biregei kásiporyn. Qazir el ishindegi bylyqtyń kesirinen ózimizdiń áskeri-tehnikalyq qajettilikterimizdi óteý úshin syrttaǵy bóten kompaniialarǵa aqsha tóleýge májbúrmiz", – dedi depýtat.
Halyq qalaýlylarynyń aitýynsha, másele tek qarajatta emes. Otandastarymyzdyń aqshasy sheteldik kompaniialardyń qaltasyna túsip jatqanymen qatar, ulttyq qaýipsizdikke tikelei qatysty mańyzdy ári qupiia aqparattar syrtqa shyǵyp ketýi múmkin.
Salanyń kásibi mamandaryn elde ustap qalý, strategiialyq nysandy qaita iske qosý – ulttyq qaýipsizdik máselesi. Memleket tez arada sheshim qabyldap, kásiporynnyń jumysyn qalpyna keltirýge kirispese, jaǵdai ýshyǵa túsýi yqtimal.
