Qostanai oblysynda sý qubyry jelileri qurylysyna Arnaýly memlekettik qordan 5 mlrd teńgeden astam qarjy bólindi, dep habarlaidy Dalanews.kz.
Memleket basshysynyń áleýmettik infraqurylymdy damytý jónindegi tapsyrmalaryn oryndaý aiasynda elimizde zańsyz iemdenilgen aktivterdi qaitarý esebinen áleýmettik nysandardyń qurylysy qarqyndy júrgizilip jatyr.
Qostanai oblysy turǵyndaryn sapaly aýyz sýmen qamtamasyz etý maqsatynda Arnaýly memlekettik qordan shamamen 5,4 mlrd teńge qarjy bólindi.
Búginde Tobyl qalasynda halyqtyń 87,9%-y ortalyqtandyrylǵan sý júiesine qosylǵan. Bul kórsetkishti 100%-ǵa jetkizý úshin qalada uzyndyǵy 100 shaqyrymnan asatyn sý qubyry jelileriniń qurylysy bastaldy. Bul maqsatqa Qordan 1,4 mlrd teńge bólindi.
Sondai-aq Arqalyq qalasyna sý qubyryn tartýǵa 872 mln teńge bólindi. Joba 13 myńnan astam turǵyny bar qalany aýyz sýmen tolyq qamtamasyz etip, 2025 jyldyń sońyna deiin sýmen qamtý deńgeiin 96,5%-dan 100%-ǵa jetkizýge múmkindik beredi.
Sonymen qatar Qarabalyq, Denisov, Qostanai, Fedorov, Beiimbet Mailin aýdandary aýyldarynda, sondai-aq Arqalyq qalasyndaǵy Jastar aýylynda jalpy quny 3 mlrd teńgeden asatyn sý qubyry jelilerin tartý josparlanyp otyr.
QR Ónerkásip jáne qurylys ministrliginiń derekterine sáikes, qazirgi tańda ortalyqtandyrylǵan sýǵa qoljetimdilik Qostanai qalasynda 99%-dy, al aýyldyq eldi mekenderde 90,3%-dy quraidy.
Eske salaiyq, buǵan deiin Ulytaý oblysynda jemqorlardan qaitarylǵan aqshaǵa aýyl turǵyndary aýyz sýmen qamtylatynyn habarlaǵan edik.
