Beisenbi kúni tústen keiin azamattyq kiimdegi úsh adam Qýanyshálindi úiiniń mańynda ustap, anyqtaityn belgisi joq kólikke kúshtep otyrǵyzyp alyp ketken. Saiasatkerdi ustaý sátinen videony Qazaq Times saity jariialady.
Aqparatqa qaraǵanda, basylymnyń tilshileri Qýanyshálinmen suhbat jasaýǵa kelisip, ýádeli ýaqytta úiine barǵan. Saiasatker suhbat berý úshin aýlaǵa shyqqan kezde baǵanaǵy úsh adam tap bergen.
Qazaq Times basylymynyń jazýynsha, jai adamdarsha kiinip alǵan úsh kisi ózderin tanystyrmaǵan, qyzmettik kýálikterin de kórsetpegen jáne saiasatkerdi ne úshin ustap jatqanyn da túsindirmegen. Qýanyshálin sol kúni keshke qarai densaýlyǵy nasharlaǵan kúii aýrýhanaǵa jetkizilgen.
Saiasatkerdiń áieli Aisulý Qadyrbaeva basylymǵa kúieýiniń bas barmaǵy shyqqanyn jáne qan qysymy joǵarylaǵanyn aitqan.
Keiin túnde Qýanyshálinniń ózi Facebook-ta oń qolyndaǵy bas barmaǵyna gips qoiylǵanyn jazdy. Onyń sózine qaraǵanda, politseiler ýchaskede ony birneshe saǵat ustaǵan, keiin jedel járdem kóligimen qalalyq aýrýhanaǵa jetkizgen. Onda bir saǵattan astam ýaqyt sistema alǵan. Túngi saǵat 23-terde úiine jetkizilgen.
Qazaqstan demokratiialyq oppozitsiiasynyń ardageri Jasaral Qýanyshálin aqpan aiynda Saiasi tutqyndardy qorǵaý jónindegi qoǵamdyq komitet qurǵanyn habarlaǵan. Komitettiń basqarý quramyna birqatar quqyq qorǵaýshy, jýrnalist pen belsendiler kirgen. Komitet Shyńjańda qýǵyn-súrginnen qashqan bosqyndardyń quqyqtaryn da qorǵaitynyn aitqan.
Sáýir aiynda saiasi tutqyndardy qorǵaý jónindegi qoǵamdyq komitet AQSh kongresi men memlekettik departamentine málimdeme joldap, Qazaqstannyń birqatar sheneýnikterine jeke sanktsiia salýǵa shaqyrǵan.
Qýǵynda júrgen oppozitsiialyq saiasatker, burynǵy bankir Muhtar Ábliazov osyǵan deiin jaqtastaryn 6 shilde kúni narazylyqqa shaqyrǵan. Astana kúni jáne eks-prezident Nursultan Nazarbaevtyń týǵan kúni qarsańynda elde oppozitsiialyq belsendiler ustalyp, qamalyp jatyr.
