Ol kisi búginde Elbasynyń uly ideiasyn júzege asyrý úshin Túrkistannyń jańa tarihynyń irgetasyn quiýda. Muny biz búgin aitpaǵanymyzben, erteń báribir aitylady. Biraq, aitpaǵymyz bul emes. Aitpaǵymyz...
Keshegi aptada Túrkistanda uly oqiǵa oryn aldy dep alaýlatyp-jalaýlatpai-aq qoiaiyq, biraq adamnyń ishi erekshe jylityn bir oqiǵa boldy. Kózi tiri aqyn-jazýshyny kez kelgen ákim qabyldaidy ǵoi, Túimebaev HH ǵasyrda qazaq rýhani áleminiń jarqyn ókilderi bolǵan Táken Álimqulov pen Asqar Súleimenovtiń otbasy múshelerin qabyldady. Naqtyraq aitqanda uly Tákenniń zaiyby Esimkúl apai men uly Asqardyń uly Álisher Súleimenov Túimebaevtyń qabyldaýynda bolyp, búgingi qazaq ádebietiniń hal kúii, Túrkistannyń búgini men keleshegi týraly keleli oilaryn ortaǵa salysty.
Jasyratyny joq, búgingidei ádebietten alystap bara jatqan ýaqytta biliktiń Táken men Asqardy izdeýi kóńilge kádimgidei úmit uialatady. Táken Álimqulov pen Asqar Súleimenov rýhani ainalysqa tolyq túsken kúni búgingi qazaqtyń estetikalyq álemi áli talai ultqa úlgi bolady. Ákim Túimebaevtyń áreketinen óz basym osy syrdy uqqandai boldym.
Jalpy, Esimkúl Álimqulova bizdiń jýrnalister áli ashpaǵan keiipkerlerdiń biri. Jańylyspasam tuńǵysh ret 1978 jyly álde 1979 jyly Qazaqstan Jazýshylar odaǵynda, Táken Álimqulovtyń alpys jyldyǵynda kórgen edim. Qasynda sol kezde bes jasar Raýan degen uly boldy. Ústinde merekelerge arnap barynsha sánmen tigilgen qara barqyt kóilek... Óte saltanatty kóringen. Árine, ol kezde sóilegen joq.
Esimkúl apaimen 2015 jyly telefonda tildestim. Meniń Táken Álimqulov týraly jazǵan bir dúniemdi saittan oqyǵan eken. Soǵan bailanysty telefonymdy izdep júrip taýyp, qońyraý shalypty. Árbir áńgimesinen naǵyz ziialynyń jary ekendigi ańǵarylady.
Mine, Túrkistandy Túrkistan qylatyn osyndai áreketter! Búginde diqan maqtasyn ákimsiz de egedi, shopan qorasyndaǵy malyn ózi úshin qońdy qylýǵa tyrysady, qurylysshy salǵan ǵimaratyn ózi úshin sapaly etip salady. Sebebi, básekeniń zamany. Al, rýhaniiat óte názik dúnie. Rýhaniiatta sál nárseden qatelesseńiz, ol ultty rýhani apatqa ákelýi múmkin. Sondyqtan da búgingi ákimderge rýhaniiattyń ótinde júrmese bolmaidy. Janseiit Túimebaevtyń alashtyń balasynyń kóńiline úmit syilaityny da sodan shyǵar.
Abai Balajan
Feisbýk paraqshasynan
