Komısıa músheleri qalanyń áleýmettik-ekonomıkalyq damýyna baǵyttalǵan keshendi damý josparyn negizge ala otyryp, Mańǵystaý oblysyndaǵy shaǵyn jáne orta bıznes sýbektileriniń áleýetin, eńbek naryǵyn jan-jaqty zerdeledi.
– Bul baǵyttaǵy jumystar jalǵasýda. Halyqqa óńirdiń barlyq turǵyndaryn munaı-gaz salasyna jumysqa ornalastyrý múmkin emestigin túsiný qajet. Men arandatýshylyqqa boı aldyrmaýǵa jáne zańsyz áreketter jasamaýǵa shaqyramyn, – dedi Mańǵystaý oblysy ákiminiń birinshi orynbasary Abzal Meńdibaev.
Komısıa jumysynyń qorytyndysy boıynsha, bıyl Jańaózen qalasynda 2570 adamdy jumysqa ornalastyrý josparlanýda. Onyń 1434 turaqty jumys orny, al 1136 ýaqytsha jumyspen qamtylatyn bolady.
Atap aıtsaq:
- Qalalyq jumyspen qamtý ortalyǵynan 5 sanat boıynsha kezekte turǵan 682 adam munaı-gaz salasyna jumysqa ornalasýdyń qoldanystaǵy algorıtmi boıynsha jumysqa qabyldanatyn bolady. Komısıa jumysy bastalǵan sátten bastap, 682 adamnyń 150-i jumysqa ornalasty.
- «Ózenmunaıgaz» AQ servıstik qyzmet kórsetý mekemelerinde halyqtyń áleýmettik osal toptaryna jatatyn, halyqtyq baqylaý toby men jumyspen qamtý jáne áleýmettik baǵdarlamalar bólimi janyndaǵy Jumys komısıasynyń usynymdaryna sáıkes qurylǵan 318 jumys ornyna tańdalǵan azamattardy jumysqa ornalastyrý kózdeledi. Onyń 300-i jumysqa ornalasý ústinde.
Keshendi damý jospary aıasynda qalalyq, kentishilik avtomobıl joldaryn jóndeý, Teńge aýylynda dene shynyqtyrý-saýyqtyrý kesheniniń qurylysy, Teńge aýylyna deıin sý qubyryn tartý syndy jumystarǵa jumyssyz júrgender tartylatyn bolady.
Sondaı-aq, jalaqysy 150 myń teńgeden bastalatyn 155 jumyssyz azamatty jumysqa ornalastyrý josparlanýda. «Jumys jasaıtyn» jobasy aıasynda 400 jumys ornyn qurý josparlanýda.
Budan basqa jeke kásipkerler esebinen 390 jumys orny qurylady. Bul bos jumys oryndarynyń jalaqysy 150 myń teńgeden bastalady.
Qala turǵyndary úshin jańa jumys oryndaryn qurý boıynsha sharalar kezeń-kezeńmen iske asyrylatyn bolady.
