Qazaqstanda media salasy úlken transformatsiia kezeńin bastan ótkerip jatyr: baspa basylymdar sany azaiyp, qoǵamdyq aqparattyń negizgi bóligi elektrondy portaldarǵa kóshti. Bul – zamanaýi úrdis, álemdik tendentsiia. Alaida osy ózgeristermen birge jańa problema paida bolýda. Bul týraly depýtat Ashat Aimahambetov jazdy, dep habarlaidy Dalanews.kz.
Depýtattyń aitýynsha, belgili bir jańalyq portaly jumysyn toqtatqanda, onyń arhivi de joǵalyp ketedi. Al arhivpen birge eldiń qoǵamdyq-saiasi tarihynyń mańyzdy tustary da qoljetimsiz bolyp qalady.
Aimahambetov dástúrli baspa BAQ-ta mundai másele áldeqashan sheshilgen gazetter men jýrnaldardyń kóshirmeleri ulttyq kitaphanalarǵa tapsyrylyp, arhivke salynatynyn atap ótti. Bul – tarihi aqparatty saqtaýdyń qalyptasqan júiesi. Biraq elektrondy redaktsiialardyń materialy joǵalsa, bolashaqta eldiń aqparattyq murasy qanshalyqty tolyq saqtalatyny suraq týdyrady.
Depýtat osy máseleler arhivter týraly zań jobasy talqylanǵan otyrysta kóterilgenin atap ótti.
«Halyqaralyq tájiribe boiynsha, kóptegen eldiń zańnamasynda tsifrlyq basylymdarǵa arnalǵan arnaiy “legal deposit” júieleri engizilgen. Iaǵni elektrondy basylymdar óz jariialanymdaryn ulttyq arhivterge tapsyrady. Biz de osy salanyń mamandarymen birge, baspa basylymdaryna qoldanylyp júrgen model boiynsha tsifrlyq jańalyq portaldaryn ortalyqtandyrylǵan arhivke berý múmkindigin talqylaýymyz kerek», - dep jazdy Ashat Aimahambetov.
Onyń sózinshe, barlyq tarapqa qolaily mehanizm tabý mańyzdy.
«Jańalyq portaly jabylyp qalsa, biz jai ǵana saittan aiyrylyp qana qoimai, el tarihynyń bir bóligin joǵaltamyz», - dedi depýtat.
