Qazaqstan ulttyq arnasynyń telejúrgizýshisi, Konstitýtsiialyq komissiia múshesi Erqanat Kópjasaruly jańa Konstitýtsiia jobasyndaǵy sóz erkindigi týraly baptardyń mańyzy jóninde pikir bildirdi, dep habarlaidy Dalanews.kz
Komissiia múshesi Ata zań jobasyndaǵy sóz bostandyǵy men ǵylymi-tehnikalyq, kórkem shyǵarmashylyq erkindigine qatysty baptarǵa toqtaldy.
«Erkin oisyz el kósegesi kógermeidi, ashyq pikir almasýsyz alǵa baspaidy. Jańa jobada sóz bostandyǵyn shekteýge qatysty norma joq. Basty maqsat – jaýapkershilik júgin kúsheitý, arandatýshylyq áreketterdiń aldyn alý. Sondai-aq, jobada aqparatty erkin alý men taratý quqyǵynyń aiqyn bekitilýi – órkenietke umtylǵan jurtqa laiyq batyl qadam», – dedi jýrnalist Konstitýtsiialyq komissiianyń toǵyzynshy otyrysynda.
Onyń aitýynsha, aqparatqa qol jetkizý quqyǵynyń naqty tetiktermen bekitilýi baspasózdiń demin ashyp, memlekettik organdardyń jaýapkershiligin arttyrady.
«Eń mańyzdysy, erkindik pen jaýapkershiliktiń bir arnaǵa toǵysýy. Adamnyń ar-namysy men abyroiyn biik qoiý, ulttyq qundylyqtardy qadirleý – erkindikti jelbýazdyqqa ainaldyrmaýdyń, ony el múddesine qyzmet etkizýdiń parasatty qadamy. Mundaǵy erkindik – júgensizdik emes, memlekettik sanaǵa negizdelgen jaýapkershilik. Osy zańnamalyq ustanym pikir alýandyǵynyń tynysyn ashyp, salaýatty synnyń órisin keńeitedi. El birligine syzat túsiretin jónsizdikke tosqaýyl qoiady», – dep tolyqtyrdy Erqanat Kópjasaruly.
Sóz sońynda ol usynylyp otyrǵan konstitýtsiialyq ózgerister jýrnalistikanyń basty missiiasyn – qoǵam men bilik arasyndaǵy altyn kópir bolýdy, aqiqatty aina-qatesiz jetkizýdi, syndarly suhbat mádenietin qalyptastyrýdy júzege asyrýǵa múmkindik beretinin atap ótti.
