Qazaqstandyqtarǵa da, basqa shetel azamattaryna da Resei shekarasynan ótý kezinde jańa shekteýler qoiylady. Endi jol qozǵalysy erejesin (JQE) júieli túrde buzý elge úsh jylǵa deiin kirgizbeýge negiz bola alady, dep habarlaidy Dalanews.kz.
RF-nyń «Resei Federatsiiasynan shyǵý jáne Resei Federatsiiasyna kirý tártibi týraly» federaldyq zańy boiynsha, eger shetel azamaty úsh jyl ishinde eki ret nemese odan da kóp ákimshilik jaýapkershilikke tartylsa, oǵan shekaradan ótýge tyiym salynýy múmkin. Bul tek aýyr quqyqbuzýshylyqtarǵa ǵana emes, salystyrmaly túrde usaq jol erejesi buzýshylyqtaryna da qatysty.
«RIA Novosti»-niń málimetinshe, sheteldik barlyq aiyppuldaryn tólegen kúnniń ózinde Reseige kirýine tyiym salynýy yqtimal.
Úsh jylǵa kirýge tyiym salýǵa negiz bolatyn jaǵdailar:
joldy belgilenbegen jerden kesip ótý nemese jaiaý júrginshi tarapynan ózge de ereje buzýshylyqtar;
qaýipsizdik belbeýin taqpaý nemese mototsikl shleminiń bolmaýy;
mas kúiin anyqtaýǵa arnalǵan meditsinalyq tekserýden bas tartý;
jaramdy tehnikalyq diagnostikalyq kartasyz kólik basqarý;
jaiaý júrginshilerge jol bermeý;
memlekettik nómirlerdi durys ornatpaý;
jol belgileri men syzyqtaryn elemeý.
Qazaqstandyqtarǵa eskertý
Reseige jii baratyn qazaqstandyqtarǵa «usaq» ereje buzýshylyqtarǵa da muqiiat bolý qajet. Óitkeni mundai faktiler kóshi-qon organdarynyń sheshim qabyldaý kezinde eskeriledi.
