Jambyl oblysynda Gvardeisk garnizonynyń Áskeri politsiiasy áskeri bólimderdiń birinde áskeri qyzmetshige kúsh qoldaný deregi boiynsha qylmystyq is qozǵady, dep habarlaidy Dalanews.kz.
Oqiǵa saldarynan áskeri qyzmetshilerdiń biri jaq súieginen jaraqat aldy. Zardap shekken sarbaz Almaty qalasyndaǵy Áskeri-klinikalyq gospitalǵa jatqyzylyp, oǵan barlyq qajetti bilikti meditsinalyq kómek kórsetilip jatyr. Qazirgi ýaqytta onyń densaýlyq jaǵdaiy áskeri dárigerlerdiń turaqty baqylaýynda.
Atalǵan derek Sotqa deiingi tergep-tekserýdiń biryńǵai tizilimine tirkelip, jan-jaqty tekserý bastaldy. Tergeý barysynda oqiǵaǵa qatysy bar adamdardyń ǵana emes, sondai-aq jarǵyǵa qaishy jaǵdaidy joǵary basshylyqqa ýaqytynda habarlamaǵan jáne zardap shekken sarbazǵa meditsinalyq kómekti uiymdastyrýda olqylyq jibergen laýazymdy tulǵalardyń da áreketine quqyqtyq baǵa beriledi.
Tergeý sharalary kezeńinde áskeri bólimniń birqatar laýazymdy tulǵalary qyzmettik mindetterin atqarýdan ýaqytsha shettetildi. Tergeý qorytyndysy boiynsha kináli tulǵalar Qazaqstan Respýblikasynyń zańnamasyna sáikes jaýapkershilikke tartylady.
Jaǵdai Qarýly Kúshter basshylyǵynyń erekshe baqylaýynda. Tergeý múddesine bailanysty ózge aqparat jariia etilmeidi.
