Jambyl oblysynda jer silkinisinen 17 áleýmettik nysan búlingen, dep habarlaidy Dalanews.kz.
Jambyl oblysynyń ákimi Erbol Qarashókeev pen tótenshe jaǵdailar vitse-ministri Kegen Tursynbaev bastaǵan úkimettik komissiia T.Rysqulov aýdanyndaǵy zardap shekken turǵyn úiler men áleýmettik nysandardy aralap shyqty.
Jańaturmys aýylynda aimaq basshysy komissiiamen birge 5 úidi aralap, jaǵdaiyn baǵamdady. Aýyl turǵyndarymen áńgimelesý barysynda Erbol Qarashókeev úileri zardap shekken turǵyndarǵa ataýly kómek kórsetiletinine sendirdi.
Aýyl mektebi ǵimaratynyń da búlingen jerleri anyqtaldy. Oblys ákimi balalarǵa qolaisyzdyq týǵyzbas úshin qalpyna keltirý jumystaryn jedel bastaý mindetin qoidy.
Memleket basshysynyń tapsyrmasyna sáikes zalaldy baǵalaý jáne búlingen múlikti qalpyna keltirý boiynsha keshendi jumystar júrgiziletin bolady. Quramyna oblys ákimdiginiń, seismologiialyq baqylaý jáne zertteýlerdiń ulttyq ǵylymi ortalyǵynyń, sondai-aq túrli ministrlikter men vedomstvolardyń ókilderi kiretin jumys toby quryldy.
Merki jáne T.Rysqulov aýdandarynyń aýyldyq eldi mekenderinde komissiia músheleri ǵimarattar men turǵyn úilerdi aralap, jai-kúiin kózben kórip, tehnikalyq tekserý júrgizedi.
Sońǵy málimetter boiynsha eki aýdanda 17 áleýmettik nysan búlingen. Onyń ishinde 11 bilim berý, 2 - densaýlyq saqtaý, 2 - áleýmettik qorǵaý, 1 - sport jáne 1 - mádeniet nysany bar.
Aýyldyq okrýg ákimdikterine turǵyndardan baspanalardyń zardap shekkeni týraly 104 aryz-shaǵym túsken. Turǵyn úilerdi tekserý jalǵasýda, shyǵyn kólemi anyqtalýda.
Aralaý jáne atqarylǵan jumystardyń qorytyndylary oblystyq jedel shtabtyń otyrysynda talqylandy.
Qazirgi ýaqytta oblystaǵy jaǵdai turaqty. Zardap shekkender joq. Áleýmettik jáne tirshilikti qamtamasyz etý nysandaryndaǵy, jol kommýnikatsiialary, ónerkásiptik kásiporyndardaǵy jaǵdai oblys basshylyǵynyń erekshe baqylaýynda.
