Bishimbaevtyń isin qarap jatqan memlekettik aiyptaýshy Aijan Aimaǵanova jelidegi oqyrmandaryna alǵys aityp, bolyp jatqan oqiǵaǵa bei-jai qaramaýǵa shaqyrdy, dep habarlaidy Dalanews.kz.
Prokýror Aijan Aimaǵanova sot otyrysy bastalǵan sátten bastap halyqtyń ystyq yqylasyna bólenip úlgerdi. Áleýmettik jelidegi paraqshasyna 240 myńǵa jýyq oqyrman jazylǵan. Munda ol óziniń alǵashqy jazbasyn jariialady.
“Qaiyrly kún! Akkaýntymdy kópshilikke jariia ete etkende kóptegen adam jazylady degen oi bolmady. Tek jalǵan akkaýnttarǵa jol bergim kelmedi. Bul - áleýmettik jelidegi jalǵyz paraqsham. Mende tik-tok joq. Stýdenttik kezimnen @zhakiti akkaýntym bar, soǵan orai osy ataýdy aldy. Qazir prokýratýra qyzmetkeri retinde maǵan júktelgen barlyq jaýapkershilikti túsinip, bar akkaýntty @aimaganova_a dep ózgertýge jáne qoǵamǵa ashyq ári paidaly bolýǵa sheshim qabyldadym”, - dep jazdy ol.
Alaida ol qazirgi jaǵdaida ózge áriptesteri sekildi jelide belsendi bola almaitynyn jetkizdi.
“Sizderdiń qoldaýlaryńyzǵa, keńesterińizge, qamqorlyqtaryńyzǵa alǵys aitqym keledi! Ómirde kóp nárse uqtym. Bir aityp ketetin jaǵdai: adam bolyp ómirge kelgen soń - adam bolý mindet. Sondyqtan bolyp jatqan isterge bei-jái qaraý – bir súikimsiz adami qasiet. Eń bastysy- júrekpen sezinip, jaqsy nietińdi aiamaý. Jan-jaqtaǵy bolyp jatqan oqiǵalarǵa nemquraily qaramaiyq, qol úshin berip kómekteseiik”, - deidi prokýror.
