Aqtóbede 16 adam jasóspirimdi uryp, tonap ketken, dep habarlaidy Dalanews.kz.
"Sedmoi kanal" málimetinshe, kámeletke tolmaǵan jasóspirim soqqyǵa jyǵylǵan.
"Balamdy stýdentter men joǵary synyp oqýshylary jabylyp urǵan", - deidi jábirlenýshiniń anasy.
Oqiǵa byltyr bolǵan. Budan keiin eki jigit "Tonaý" babymen qylmystyq jaýapkershilikke tartylǵan. Qalǵandary buzaqy retinde tergelgenimen, eshqandai jaza berilmegen. Sóitip, is jyly jabylǵan. Ol azdai "bala áli kúnge deiin solardan qysym kórip júr" deidi anasy. Áiel tóbelesten aýyr jaraqat alǵan balasyn tolyq meditsinalyq kómekpen qamti almai otyr.
Alǵa qalasynyń turǵyny Ótebike Qursaýbaeva jarty jyldan beri ádildikke qol jetkize almai júr. Onyń 17 jastaǵy uly byltyr qarashada soqqyǵa jyǵylyp, eki apta aýrýhanada jatqan. Anasynyń aitýynsha, ony 16 adam jabylyp urǵan. Onymen qoimai, telefonynyń parolin aitýǵa májbúrlep, bank kartasynan óz shotyna aqsha aýdaryp alǵan. Bul isten keiin eki adam shartty túrde sottalǵan. Qalǵan 14-ine qatysty qylmystyq is toqtatylǵan.
"Nege ekenin eshkim túsindirmeidi", - deidi jábirlenýshi áiel.
Ótebike Qursaýbaevanyń ózi II toptaǵy múgedek, epilepsiiamen aýyrady. Buryn ustama kezinde oǵan balasy kómektesip júrgen. "Endi balamdy dárigerge aparǵan saiyn 20 myń teńge tastap ketemin", - deidi ol.
Al politsiia qalǵan kúdiktilerge qatysty istiń "qylmys quramy joq" dep toqtatqan.
"2024 jyly qarashada Alǵa aýdandyq politsiia bólimi qaraqshylyq babymen qylmystyq is qozǵap, tergeý júrgizdi. Tergeý bitkennen keiin sotqa júgindi. Eki kúdikti bas bostandyǵyn shekteý boiynsha sottaldy. Tergeý barysynda birneshe kúdiktiniń ústinen qylmystyq is qozǵaldy. Biraq olardyń tarapynan qylmys quramy bolmaǵandyqtan, is qysqartyldy", - dedi PD ókili.
