Almaty oblysy Ile aýdanynyń burynǵy ákimi Baǵdat Qarasaevqa qatysty qylmystyq is sotqa joldandy – is Qazaqstan Respýblikasy Qylmystyq kodeksiniń jeti birdei baby boiynsha qaralady, dep habarlaidy Dalanews.kz.
"Qazaqstan Respýblikasynyń Sybailas jemqorlyqqa qarsy is-qimyl agenttiginiń (sybailas jemqorlyqqa qarsy qyzmettiń) Almaty oblysy boiynsha departamenti Qarasaev B.Á. men basqa da tulǵalarǵa qatysty sotqa deiingi tergep-tekserý amaldaryn aiaqtady. Qylmystyq is myna baptar boiynsha qozǵaldy: 189-bap – senip tapsyrylǵan bóten múlikti iemdený nemese ysyrap etý, 190-bap – alaiaqtyq, 324-bap – sharýashylyq nemese ózge de qyzmetke qoiylatyn ekologiialyq talaptardy buzý, 361-bap – laýazymdyq ókilettikterdi teris paidalaný, 362-bap – bilikti nemese laýazymdyq ókilettikterdi asyra paidalaný, 364-bap – kásipkerlik qyzmetke zańsyz aralasý, 369-bap – qyzmettik jalǵandyq", – dep habarlady Almaty oblystyq prokýratýrasynyń baspasóz qyzmeti sársenbi kúni QazTAG redaktsiiasyna.
Qadaǵalaýshy organnyń málimetinshe, qylmystyq is 31 naýryzda Almaty oblysy Ile aýdandyq sotyna máni boiynsha qaraý úshin joldanǵan.
"Qarasaev B.Á.-ge qatysty bultartpaý sharasy retinde qamaýǵa alý túri tańdalǵan", – dep tolyqtyrdy prokýratýra.
Eske salaiyq, 2024 jyly 4 qyrkúiekte Qarasaevtyń ustalǵany belgili boldy.
Baǵdat Qarasaev Ile aýdanyn 2018 jylǵy qyrkúiekten bastap basqardy. Oǵan deiin Almaty oblysy ákiminiń keńesshisi, Taldyqorǵan qalasynyń ákimi, sondai-aq oblys ákimdigi apparatynyń basshysy qyzmetterin atqarǵan.
Ile aýdanynyń ákimshilik ortalyǵy – Almaty irgesindegi Ótegen batyr kenti (GRES). Aýdan aýmaǵynan birneshe temirjol jelileri men avtokólik joldary ótedi, munda kóptegen logistikalyq habtar men temirjol tuiyqtary ornalasqan. Olardyń arasynda "sońǵy kilometr" dep atalatyn infraqurylym da bar. Osy faktorlardyń áserinen Ile aýdany Almaty oblysyndaǵy eń bai aýdandardyń biri sanalady jáne óńir biýdjetine edáýir úles qosyp keledi.
