Almatynyń qylmystyq ister jónindegi mamandandyrylǵan aýdanaralyq sotynda Gúlmira Satybaldyǵa qatysty sot otyrysy ótip jatyr. Sotta jábirlenýshi olar Almatyda qandai nysandar salǵanyn aitty, - dep habarlaidy Dalanews.kz.
Sotta jábirlenýshi kásipker Abai Júnisovtiń aǵasy Qasym Júnisov sóiledi. Ol jábirlenýshi men Gúlmira Satybaldy ielik etken qurylys kompaniiasynda jumys istegen. Qasym Júnisovtiń sózinshe, ol 2011 jyly Gúlmira Satybaldymen kezdesip, jaqsy aralasyp ketken. Satybaldy aǵasy ekeýine "ákimshilik resýrsyn" usynǵan.
"Bizge jaqsy kómektesip júretin, oǵan sendik, sebebi Qairat Satybaldy men Nazarbaevpen tyǵyz bailanysta bolatyn. Nátijesinde 1200 adam siiatyn mektep saldyq. Joba jaqsy oryndaldy jáne eki jylda salynýdyń ornyna qurylys bir jylda bitti. Ekinshi jobamyz - quny 4,5 milliard teńge jáne 3,7 milliard teńge bolatyn Nazarbaev intellektýaldyq mektepteri.
Odan bólek, quny 24 milliard teńge bolatyn muz aidynyn saldyq. Jobalarda qandai da bir problema bolmaityn, bárin ýaqytynda saldyq. Muz aidynyna qatysty - Nazarbaevtyń ózi de kelgen bolatyn, sýretter bar. Sonymen qatar, Almatynyń ákimi bolǵan Baýyrjan Baibek 1200 oqýshy siiatyn himiia-biologiia mektebiniń jobasy da boldy", - deidi Qasym Júnisov.
Jábirlenýshiniń advokaty joba qurylystary kezinde túsirilgen sýretterdi bárine kórsetýdi surady. Olardyń sózinshe, osylaisha barlyq joba Gúlmira Satybaldy aitqandai aqsha jymqyrý arqyly salynbaǵanyn dáleldeýge bolady.
Muny Gúlmira Satybaldynyń da advokaty qoldap, biraq basqa málimdeme jasady.
Onyń sózinshe, sýretter aǵaiyndy Júnisovterge Satybaldymen birge jumys isteý tiimdi ekeniniń dáleli bola alady.
