Ótken jyldyń 5 mamyrynda Grýziiada 26 jastaǵy Ásel Aitpaevanyń denesi tabylǵan bolatyn. Ólim aldynda ol dosyna aýdio habarlama jiberip úlgergen. Aýdioda er adamnyń ony zorlyqpen qorqytyp jatqany jazylǵan.
Grýziia prokýratýrasy boijetkenniń zorlanǵanyn málimdedi. Kúdikti 56 jastaǵy Besik Tordýa kelesi kúni ustaldy. Ol zorlaý jáne ózin-ózi óltirýge itermelegeni úshin 8 jyldan 10 jylǵa deiin bas bostandyǵynan aiyrylýy múmkin edi. Alaida Tordýa keiin túrme aýrýhanasynda qaitys boldy.
Grýziianyń bas prokýratýrasy taǵy bir kúdiktige – Áseldiń týysy Murat Meiirbekovke de aiyp taqqan.
Ony Nur-Sultan politsiiasy biyl 16 mamyrda ustaǵan edi. Meiirbekov qyzdy jumysqa turǵyzý syltaýymen Grýziiaǵa shaqyrtyp alyp, keiin ony paidalanyp ketken. Qylmystyq is «zorlaý» baby boiynsha júrgizilgendikten, sot otyrysy baspasóz úshin jabyq ótetini habarlandy.
26 jastaǵy Ásel Aitpaeva Grýziiadaǵy kópqabatty úidiń terezesi aldynan óli kúiinde tabylǵan edi. Onda ol alys týysy bolyp keletin Meiirbekovtyń shaqyrýymen jumysqa barǵan. Bul óte óreskel qatelik boldy deidi marqumnyń týystary.
Áseldiń ápkesiniń aitýynsha, ol árqashan shetelde ómir súrýdi armandaǵan. Óz páterine aqsha jinaǵysy kelgen. Qyz úiine tabytpen oralady dep eshkim oilamaǵan.
"Eger ony bóten bireý shaqyrsa, ol shetelge barmas edi. Biz de ony jibermes edik. Al bul rette týysymyz ǵoi, shynymen de kómektesip jiberedi dep úmittenip, sendik. Sóitsek Ásel onyń birinshi qurbany emes eken. Instagram arqyly bizge taǵy eki qyz shyqty. Myna Meiirbekov ol eki qyzǵa da shyǵyp, shetelge shaqyrypty", – degen bolatyn Dalanews.kz-ke pikir bildirgen marqumnyń ápkesi.
