وتكەن جىلدىڭ 5 مامىرىندا گرۋزيادا 26 جاستاعى اسەل ايتپايەۆانىڭ دەنەسى تابىلعان بولاتىن. ءولىم الدىندا ول دوسىنا اۋديو حابارلاما جىبەرىپ ۇلگەرگەن. اۋديودا ەر ادامنىڭ ونى زورلىقپەن قورقىتىپ جاتقانى جازىلعان.
گرۋزيا پروكۋراتۋراسى بويجەتكەننىڭ زورلانعانىن مالىمدەدى. كۇدىكتى 56 جاستاعى بەسيك توردۋا كەلەسى كۇنى ۇستالدى. ول زورلاۋ جانە ءوزىن-وزى ولتىرۋگە يتەرمەلەگەنى ءۇشىن 8 جىلدان 10 جىلعا دەيىن باس بوستاندىعىنان ايىرىلۋى مۇمكىن ەدى. الايدا توردۋا كەيىن تۇرمە اۋرۋحاناسىندا قايتىس بولدى.
گرۋزيانىڭ باس پروكۋراتۋراسى تاعى ءبىر كۇدىكتىگە – اسەلدىڭ تۋىسى مۇرات مەيىربەكوۆكە دە ايىپ تاققان.
ونى نۇر-سۇلتان پوليسياسى بيىل 16 مامىردا ۇستاعان ەدى. مەيىربەكوۆ قىزدى جۇمىسقا تۇرعىزۋ سىلتاۋىمەن گرۋزياعا شاقىرتىپ الىپ، كەيىن ونى پايدالانىپ كەتكەن. قىلمىستىق ءىس «زورلاۋ» بابى بويىنشا جۇرگىزىلگەندىكتەن، سوت وتىرىسى باسپا ءسوز ءۇشىن جابىق وتەتىنى حابارلاندى.
26 جاستاعى اسەل ايتپايەۆا گرۋزياداعى كوپقاباتتى ءۇيدىڭ تەرەزەسى الدىنان ءولى كۇيىندە تابىلعان ەدى. وندا ول الىس تۋىسى بولىپ كەلەتىن مەيىربەكوۆتىڭ شاقىرۋىمەن جۇمىسقا بارعان. بۇل وتە ورەسكەل قاتەلىك بولدى دەيدى مارقۇمنىڭ تۋىستارى.
اسەلدىڭ اپكەسىنىڭ ايتۋىنشا، ول ءارقاشان شەتەلدە ءومىر ءسۇرۋدى ارمانداعان. ءوز پاتەرىنە اقشا جيناعىسى كەلگەن. قىز ۇيىنە تابىتپەن ورالادى دەپ ەشكىم ويلاماعان.
"ەگەر ونى بوتەن بىرەۋ شاقىرسا، ول شەتەلگە بارماس ەدى. ءبىز دە ونى جىبەرمەس ەدىك. ال بۇل رەتتە تۋىسىمىز عوي، شىنىمەن دە كومەكتەسىپ جىبەرەدى دەپ ۇمىتتەنىپ، سەندىك. سويتسەك اسەل ونىڭ ءبىرىنشى قۇربانى ەمەس ەكەن. ينستاگرام ارقىلى بىزگە تاعى ەكى قىز شىقتى. مىنا مەيىربەكوۆ ول ەكى قىزعا دا شىعىپ، شەتەلگە شاقىرىپتى"، – دەگەن بولاتىن Dalanews.kz-كە پىكىر بىلدىرگەن مارقۇمنىڭ اپكەسى.
