Fransıa Qazaqstan men Ortalyq Azıa elderine muzdyqtardyń erýine qarsy kúres boıynsha tájirıbesimen bólisýge daıyn, dep habarlaıdy Dala News.
Fransıanyń Qazaqstandaǵy elshisi Sılvan Gıoge aıtýynsha, elinde de muzdyqtar bar jáne olardy saqtaý men erip jatqan muzdyqtardyń saldarymen kúres boıynsha belgili bir tájirıbe jınaqtalǵan.
«Bizde de muzdyqtar bar, biraq kólemi jaǵynan az. Soǵan qaramastan, olardy qalaı saqtaý kerek jáne erigennen keıingi saldarymen qalaı kúresý qajet – osy baǵytta óz tájirıbemizben bólise alamyz», – dedi elshi.
Ol sondaı-aq klımattyń ózgerýi máselesinde halyqaralyq yntymaqtastyqtyń mańyzyn atap ótti. Onyń sózinshe, Fransıa bul baǵytta saıası dıalogty belsendi júrgizip keledi jáne Parıj kelisimi aıasynda elder ortaq mindettemelerdi oryndaýy tıis.
Elshi muzdyqtardyń erýi máselesin sheshý úshin halyqaralyq qaýymdastyqtyń qarjylyq jáne saıası qoldaýy qajet ekenin aıtty.
Sonymen qatar, Fransıa sý jáne energıa resýrstaryn tıimdi basqarý tájirıbesimen bólisýge jáne osy saladaǵy zamanaýı tehnologıalardy usynýǵa daıyn ekenin jetkizdi.
