Forbes tizimindegi milliarderlerge tiesili qus fabrikasynda tótenshe jaǵdai boldy. Almaty oblysyndaǵy "Alel Agro" qus fabrikasyndaǵy órt saldarynan adam qaza tapty,- dep habarlaidy Dalanews.kz.
Oqiǵa Ile aýdanyna qarasty Túimebai aýylyndaǵy "Alel Agro" kásipornynda bolǵan.
Tótenshe jaǵdailar departamentiniń málimetinshe, órt 28 shildede Ashybulaq okrýgindegi zaýyt aýmaǵyndaǵy ashana ǵimaratynda bastalǵan. Órt 450 sharshy metrdi sharpyǵan, órtti sóndirý kezinde qutqarýshylar er adamnyń denesin tapqan.
"Ashyq jalyndy sóndirýge 42 maman men 14 tehnika jumyldyryldy. Órt 450 sharshy metr aýmaqta tolyǵymen aýyzdyqtaldy. Órttiń jaqyn mańdaǵy nysandarǵa taralýyna jol berilmedi", - dep jazylǵan habarlamada.
Órt qaýipsizdigi talaptaryn buzý deregi boiynsha qylmystyq is qozǵaldy.
"QR Qylmystyq kodeksiniń 292-baby 2-bóligi - "Abaisyzda adam ólimine ákep soqqan órt qaýipsizdigi talaptaryn buzý" boiynsha qylmystyq is qozǵaldy", - dep jazylǵan habarlamada.
Qus fabrikasy Qazaqstannyń iri agroónerkásiptik holdingteriniń biri - "Alel Agro" AQ qurylymyna kiredi. Forbes málimetteri boiynsha aktsionerler arasynda Ǵalymjan Esenov (44%), Marǵulan Seisembaev (21%) jáne Sáýle Seisembaeva (13%) bar.
