EXPO kórmesin búginge deiin ońtústikqazaqstandyq 2250 oqýshy baryp tamashalady
Saiahattyń alǵashqy kúninde belsendi top kórmeniń basty nysany – «Nurly álem» ulttyq pavilony, sondai-aq, sheteldikterdiń usynǵan zamanaýi tehnologiiasynyń jańa jetistikterin tamashalap, energiia-qýat kúshin alatyn tyń joba – jeke aimaǵymen tanysýda. Ekinshi kúninde Elordamyzdaǵy birqatar mádeni oshaqtar – QR Ulttyq mýzeii men Beibitshilik jáne Kelisim saraiy, «Astana-Báiterek» monýmentaldy ǵimaraty, «Prezident» saiabaǵy sekildi aýqymdy nysandardy aralaidy.
«Astana – EKSPO 2017» mamandandyrylǵan kórmesine barǵan oqýshylarǵa bes kúndik baǵdarlama bekitilgen. Onda balalar jol júrý biletteri men 4 mezgil tamaqpen tegin qamtyldy. Al kórmege baryp, igi bastamaǵa qatysyp qaitqan shákirtterdiń bilim men ǵylymǵa, qoǵamǵa degen qurmet-qushtarlyǵy eselengenin baiqaýǵa bolady.
«Úlken qobaljý ústindemin. Kúngeiden kórmege kelý – men úshin mártebe! Alǵan áserimdi sózben aityp jetkize almaimyn! Halyqaralyq mádeni sharada sheteldik ónertapqyshtardyń jetistigimen tanysyp, jańa tehnologiianyń keń múmkindikterin saraladym. Bolashaqta meniń de ǵalym bolǵym keledi. Elimniń igiligi úshin ǵylymi zertteýler júrgizip, damyǵan eldermen terezemiz teń bolýy jolynda qyzmet etý – maqsatym», - deidi Q.Spataev atyndaǵy №7 mektep-litseiiniń oqýshysy Ásel Músiretáli.
Aita keteiik, EXPO-2017 halyqaralyq kórmesine joldama oqýda ozat bolǵan oqýshylarǵa ǵana emes, áleýmettik az qamtylǵan otbasynyń balalaryna da tabystalǵan. 1650 shákirt úshin memleket tarapynan arnaiy qarjy qaralsa, 2000 balaǵa ata-analary men jergilikti kásipkerler demeýshilik jasady. Iaǵni, ázirge 2250 shákirt aitýly kórmeni tamashalap qaitqan bolsa, qalǵan 1400 oqýshy aǵymdaǵy jyldyń qyrkúiek aiyna deiin Elordamyzǵa baryp, mádeni sharany kózben kórmek.
OQO ákiminiń baspasóz qyzmeti
