Kınofestıvaldiń eń basty júldesin qyrǵyzstandyq rejıser Mırlan Ábdiqalyqovtyń "Kóktegi qonys" fılmi ıelendi. "Eń úzdik rejıserlik jumys" atalymy boıynsha "Nabat" fılmi úshin ázirbaıjandyq Elvır Mýsaoglý jeńimpaz atandy. "Jat" fılminde oınaǵan Erlan Nurymbetov "Eń úzdik er adam roli" atalymy boıynsha júldege ıe boldy. Áıel obrazyn úzdik somdaǵany úshin "Nabat" fılminiń aktrısasy Fatıma Motamed-Ará jeńimpaz dep tanyldy. Qazylar alqasy taǵaıyndaǵan arnaıy júldege "Súıikti is" fılminiń rejıseri Adıtá Vıkram Sengýpta (Úndistan) ıe boldy.
"Eýrazıada" halyqaralyq qazylar alqasymen birge FIPRESSI jáne NETPAK kınosynshylary jumys istedi. FIPRESSI qazylar alqasynyń júldesin "Shlagbaým" fılmi úshin qazaqstandyq rejıser Jasulan Poshanov ıeledi. NETPAK qazylarynyń "Ortalyq Azıadaǵy úzdik fılm" júldesin rejıser Doshan Joljaqsynov "Qunanbaı" fılmi úshin jeńip aldy. Sonymen qatar, eń úzdik áıel jáne eń úzdik er adam roli atalymdarynyń jeńimpazdary da anyqtaldy. Olarǵa Erkebulan Daıyrov ("Shlagbaým") jáne Álfıa Symbaeva ("Saǵyntaıdyń birinshi áıeli") ıe boldy.
Halyqaralyq qazylar alqasynyń tóraǵasy belgili rejıser, 20 júldeniń laýreaty atanǵan Abderrahman Sıssako boldy. Bıyl festıváldiń dırektory aýysty, ony tanymal kınorejısser Rashıd Nuǵmanov basqardy. Aıta keteıik, "Eýrazıa" kınofestıvaliniń aıasynda qazaqstandyq belgili rejıser Aqan Sataevtyń "Haker" fılminiń álemdik premerasy ótti. Kartınanyń prezentasıasyna basty roldi somdaǵan, amerıkalyq Kallen MakOlıff keldi. Festıváldiń jabylý saltanaty kezinde Qazaq Ulttyq Óner ýnıversıtetiniń rektory Aıman Musahodjaeva MakOlıffke dombyra syıǵa tartty.
Aıta keteıik, "Eýrazıa" kınofestıvali "Uly Jibek joly: Batys pen Shyǵys mádenıetiniń baılanysy" uranymen ótkizildi. "Eýrazıa" aıasynda bıyl alǵash ret "Sháken Juldyzdary" ótti. Jańa kınofestıval Qazaqstan men Ortalyq Azıa kınematograftarynyń qoldaýymen uıymdastyryldy.
