Eurasian Resources Group-tyń (ERG) bas atqarýshy direktory bolyp ERG-diń úsh quryltaishysynyń biri, marqum Alidjan Ibragimovtyń uly - Shýhrat Ibragimov taǵaiyndaldy, dep jazady Dalanews.kz.
"Shtab-páteri Liýksembýrgte ornalasqan, paidaly qazbalardy óndirip, óńdeitin ártaraptandyrylǵan jetekshi top Eurasian Resources Group Shýhrat Ibragimov myrza toptyń SEO (Bas atqarýshy direktory) qyzmetine taǵaiyndalǵanyn habarlaidy. Osy laýazymda on jyldan artyq eńbek etken Benedikt Sobotka myrza biznesti basqarýdy tabystaý boiynsha qajetti kómek kórsetip, ERG komandasymen bailanysta bolady. Buǵan deiin Bas atqarýshy direktordyń birinshi orynbasary bolǵan Shýhrat Ibragimov kompaniiadaǵy sabaqtastyqty qamtamasyz etedi", delingen 2024 jyly 2 qazanda ERG baspasóz qyzmeti taratqan habarlamada.
Eurasian Resources Group aktsionerleri týraly az-kem málimet
Aktsionerler: QR Qarjy ministrligi – 40%, Aleksandr Mashkevich pen Ibragimovtar otbasy – 20,7%, Patoh Shodiev – 18,6%.
Aleksandr Mashkevich, Patoh Shodiev, marqum Alidjan Ibragimovtaryń otbasy (jubaiy Muqadashan Ibragimova jáne tórt uly - Dostan, Davron, Shýhrat jáne Fýrhat) 2005 jyly Forbes nusqasy boiynsha Qazaqstandaǵy alǵashqy milliarderler atanǵan, sol kezdegi olardyń árqaisysynyń kapitaly 1 milliard dollardy qurady.
Keiinirek, Aleksandr Mashkevich jáne Patoh Shodiev azamattyǵyn ózgertti. Eurasian Resources Group Direktorlar keńesiniń tóraǵasy ári iri aktsioneri Aleksandr Mashkevich 2022 jyly Forbes reitingisi boiynsha eń bai adamdardyń tiziminde altynshy turdy. Izrail azamatynyń sol kezdegi bailyǵy 3,7 mlrd dollarǵa baǵalanǵan. 2023-2024 jyldary Mashkevich pen Shodievtardyń aty-jóni bul tizimnen kórinbedi, esesine Ibragimovtar otbasynyń bailyǵy arta tústi: 2023 jyly – 1,32, mlrd, 2024 jyly - 1,5 mlrd dollar.
Qyrkúiek aiynda Keńes Raqyshev pen Shýhrat Ibragimov Timýr Qulybaevqa tiesili "Shubarkól Premiým" kómir óndiretin kompaniiasyn satyp alǵany habarlandy.
2022 jyldy "Shubarkól Premiým" 4 mlrd teńge shyǵynmen aiaqtady. Shubarkól kómir ken ornynda ERG qurylymyna kiretin bir ǵana kompaniia — "Shubarkól Kómir" jumys isteidi. "Shubarkól Premiým" 2013 jyly qurylyp, 2017 jylǵa deiin "Arbat ÁK" degen atpen jumys istedi. 2013 jyldyń qarasha aiynda ol Japoniiaǵa jáne basqa elderge kómir eksporttaý boiynsha 25 jyldyq kelisimshartqa qol jetkizgen.
Qazaqstandyq oligarh Alidjan Ibragimov 2021 jyly 3 aqpanda 67 jasynda Belgiiada dúnieden ozdy. Qazaqstanda júrgende ol koronavirýs infektsiiasyn juqtyryp, aýrýy asqynǵan soń Belgiiaǵa attanǵan.
