Belgili saıasattanýshy Dosym Sátbaevtyń sózinshe, Qýandyq Bıshimbaevtyń sotta ekstrasenster týraly aıtqany qazaqstandyq sheneýnikterdiń qandaı ekenin kórsetip berdi, - dep habarlaıdy Dalanews.kz.
Saıasattanýshy Sátbaev Bıshimbaevtyń ekstrasenster týraly áńgimesi Ońtústik Koreıanyń úshinshi prezıdenti Pak Kyn He túrmede bolǵan kezdegi oqıǵany eske túsiretinin jetkizdi.
"Ol sybaılas jemqorlyq jasady dep aıyptaldy. Sonymen qatar, keıin syrtqy jáne ishki saıasat týraly aqymaq sheshimderin kóbine kóripkeldermen, baqsylarmen jáne balgerlermen keńesip qabyldaǵany belgili boldy. Solardyń biri onyń eń jaqyn dosy da bolǵan", - dep jazdy Sátbaev.
Osy isteri úshin Ońtústik Koreıanyń burynǵy prezıdenti 24 jylǵa bas bostandyǵynan aırylyp, sybaılas jemqorlyq, paraqorlyq jáne bopsalaý úshin 16,8 mıllıon dollar aıyppul tólegen. Ol bireýdi óltirse, 1997 jyldan beri qoldanylmasa da, kúshi joıylmaǵan ólim jazasyna kesilýi múmkin edi.
"Biraq Bıshimbaev sıaqty adamdar da sol sekildi eldi basqarýǵa tyrysty. Tuńǵysh prezıdenttiń tusynda sol sıaqtylar eldiń kadrlyq rezervin jańa saıası "elıta" retinde belsendi túrde pıar jasady.
Búdjet esebinen shetelde oqytty. Bireýine laýazym berdi, bireýine medal taqty. Al olar kabınetterinde ózderin Qudaı sanap otyrdy", - dedi saıasattanýshy.
Sonymen qatar, Sátbaev mundaı tıptegi adamdar bireýlerge qajet bolǵanyn, óıtkeni olar ar-uıatsyz, namyssyz ekenin jetkizdi. Iaǵnı bir jaǵynan qarasań, bilimi bar sekildi, biraq adamı qundylyqtary joq.
"Shamasy, quraldary jaqsy boldy. Dýa jasady. Qara magıamen aınalysty. Kóripkelderdiń tizimin jasady. Taǵy qansha adam dıplomdarymen, jalǵan ıntellektýaldy tulǵalarymen osylaı sheneýnik kabınetteriniń tasasynda qalyp qoıdy? Biraq olardyń júrekteri taza emes. ...Keıbireýleri áleýmettik jaǵynan tómen kez kelgen adamdy qorlaýǵa, balaǵattaýǵa daıyn", - dep jazdy ol.
Aıta keteıik, Qýandyq Bıshimbaevtyń sotynda birneshe ret ekstrasenster taqyryby kóterildi. Alǵashynda jábirlenýshi tarap ókili Bıshimbaev Núkenovany ekstrasensterge májbúrli túrde aparǵanyn málimdedi.
"Meniń bilýimshe, Qýandyq únemi balgerlerge, ekstrasenterge baryp júrgen. Saltanatpen kezdeskenge deıin de qandaı da bir suraqtarmen júginip otyrǵan. Balger "ıá, senderde bári jaqsy bolady, ol seni jaqsy kórip qalady" degen. Maǵan aıtqan kúni Saltanatty ala barǵan... Saltanat ta Bıshimbaev ártúrli suraqpen balgerlerge jıi júgingenin aıtty", - dedi Aıtbek Amangeldi.
Keıin Bıshimbaevtyń ózi de Saltanat qınalyp jatqanda jedel járdemge emes, balgerge habarlasqanyn aıtty.
"Uıyqtap qaldyq, saǵat 13:30-da ony oıata bastadym. Ol oıanǵan joq. Sol jaq betinde kógergen úlken iz bary jáne murny isigeni baıqaldy. Men qatty ýaıymdap kettim. Tanys balgerge qońyraý shaldym. Oǵan oıanǵanbaǵanyn, kógergen jerin aıttym. Ol 10 mınýttan keıin qaıta qońyraý shalýymdy ótindi. Men qaıta qońyraý shaldym, ol "jaı ǵana sharshaǵan" dedi. Meniń júregim ornyna tústi", - dedi aıyptalýshy.
