Ertis ózeninde qaiǵyly jaǵdai boldy. 8 jastaǵy balany ózen aǵysy alyp ketip, qutqarýshylar onyń denesin sýdan tapty, dep habarlaidy dalanews.kz 24KZ-ke siltep.
Oqiǵa 24 shildede Pedagogikalyq institýt mańynda, Ertis ózeninde bolǵan. Aldyn ala málimet boiynsha 2018 jyly týǵan bala anasynyń janynda sý jaǵasynda júrgen. Oiyn kezinde ony ózen aǵysy alyp ketken.
Oqiǵa ornyna Semei qalasynyń Tótenshe jaǵdailar basqarmasy men Abai oblysy Tótenshe jaǵdailar departamentiniń jedel qutqarý jasaǵynyń qyzmetkerleri dereý jetken.
"Izdeý-qutqarý jumystary barysynda balanyń denesi tabylyp, sýdan shyǵaryldy. Qutqarý jumystaryna Semei qalasynyń Tótenshe jaǵdailar basqarmasy men Abai oblysy TJD jedel qutqarý jasaǵynyń mamandary jumyldyryldy", – dedi Abai oblysy Tótenshe jaǵdailar departamentiniń ókilderi.
Qaiǵyly jaǵdai sýǵa túsýge tyiym salynǵan jáne arnaiy jabdyqtalmaǵan jerde bolǵan.
