Naqtyraq aıtqanda, "Oskar" júldesine nomınant bolǵan fılmderdiń avtory mádenıet mınıstrligindegi "para" men Qazaqstanda memlekettik tóńkerilis jasamaq boldy dep aıyptalyp, qamaýǵa alynǵan shymkenttik bıznesmen Toqtar Tóleshovtiń kınostýdıasyndaǵy fılm túsirý jumystary jaıynda aıtyp berdi.
Rejıser Talǵat Jánibekovtyń mádenıet jáne sport mınıstri Arystanbek Muhamedıulyn para surady dep aıyptap, taıaýda jasaǵan atyshýly málimdemesine qatysty Tursynov bylaı dedi: "Mádenıet mınıstrine qatysty kóp sóz aıtylyp jatyr. Óz kezinde maǵan da solaı sóz aıtylǵan. Men "birge bir tóbelesý", "Toppen bir adamǵa jabylmaý kerek" degen túsinikpen ósken adammyn. Al munda bastapqyda bir adam sóz aıtyp, keıin barlyǵy jabylyp ketkenin kórip otyrmyz. Biraq mádenıet salasyndaǵy problemalar Muhamedıulyǵa deıin-aq boldy ǵoı, sońǵy 25 jyldaǵy mınıstrlerdiń kezinde boldy ǵoı".
Al rejıserdiń ózinen para bopsalandy ma degen suraqqa ol "joq" dep jaýap qatty. "Muhamedıulymen jaqsy qarym-qatynastamyn, óner ınstıtýtynyń rektory bolyp turǵanynan beri tanyspyz. Sol kezdiń ózinde men tanymal rejıser edim, al ol mádenıet mınıstri bolǵan joq. Ol jaqsy jigit, kópshil, roıálda oınaıdy, án aıtady", – dedi Tursynov.
Al bıznesmen Tóleshov pen onyń kınostýdıasy jaıly aıta otyryp, Ermek Tursynov "Blıjnıı boı" fılmine senarı jazǵanyn, biraq kúmándi oılardan keıin túsirilim jumystary unamaı qalǵanyn, sondyqtan bul isti "tastaýdy" sheshkenin málimdedi.
"Fılm Shymkentte túsirildi, Toqtar Tóleshovtiń Shymkent pictures kınostýdıasynda. Tóleshov jaıly ne aıta alamyn? Ol, árıne, ózine tán qasıetteri bar adam, shymkenttikterdiń ishinde de erekshelenip turady. Fılmdi kórmedim, alaıda jumys materıaldaryn jibergende munyń nashar kartına ekenin uǵyp, tıtrlerden meniń aty-jónimdi alyp tastaýdy suradym. Senarı jazǵanym úshin olar maǵan aqsha tólemedi. Toqtar Tóleshovke adam retinde ókpem joq. Ol óte qonaqjaıly adam, eshkimde joq záýlim úıinde bizdi kútip alǵan edi, al onyń ne búldirgeni, Nazarbaevty bılikten ketirgisi keldi me, joq pa – ol meniń sharýam emes", – dedi kınodramatýrg.
Derekkózi: kaz.tengrinews.kz
