Qaraǵandydaǵy feroqorytpa zaýytynyń segiz jumysshysy kenetten peshten shyqqan jalynnyń saldarynan qatty kúıik alyp, aýrýhanaǵa jetkizildi. Olardyń biri 22 shildede qaıtys boldy, - dep habarlaıdy Dalanews.kz.
Dárigerler segiz naýqastyń altaýynyń jaǵdaıyn óte aýyr dep otyr.
"Dárigerler qoldan kelgenniń bárin jasaǵanymen, Qaraǵandy feroqorytpa zaýytynda zardap shekken jumysshyny aman alyp qala almady. 1993 jyly týǵan, denesiniń 85 paıyzy kúıip qalǵan, osy ýaqytqa deıin óte aýyr jaǵdaıda bolǵan naýqas qaıtys boldy. Marqumnyń jaqyn týystaryna shyn júrekten kóńil aıtamyz", - delingen oblystyq densaýlyq saqtaý basqarmasynyń habarlamasynda.
Eske salaıyq, 20 shildede, tańǵy saǵat 04:10-da YDD Corporation feroqorytpa zaýytynda shtattan tys jaǵdaı boldy. Oqysta №1 peshten jalyn shyǵyp, saldarynan kásiporynnyń 8 qyzmetkeri túrli dárejedegi jaraqat aldy.
Kompanıa senbi kúni, 20 shildeniń tańynda zardap shekken barlyq qyzmetkerdiń aýrýhanada jatqanyn, olarǵa shuǵyl medısınalyq kómek kórsetiletinin aıtty.
"Kompanıa zardap shekkenderge barlyq kómek kórsetedi jáne aýrýhananyń medısınalyq qyzmetkerlerimen únemi baılanysta bolady", - dep sendirdi YDD.
YDD Corporation feroqorytpa zaýyty Qaraǵandyda ornalasqan. Jylyna shamamen 240 myń tonna ferrosılısıı óndiredi. "YDD Corporation" JSHS quryltaıshysy kompanıanyń teń ıesi Erlan Nyǵmatýlın boldy. 2021 jyly Forbes Kazakhstan nusqasy boıynsha Qazaqstannyń eń yqpaldy 50 bıznesmeniniń reıtıńine kirdi.
