Qyrkúiek aiynda volonterlik qyzmetke qatysty jańa zań kúshine enedi dep kútilýde. Onyń basty ereksheligi – qoǵamdyq mańyzy bas iske atsalysyp, kómegin kórsetýden taiynbaityn eriktilerge memlekettik qyzmetke turarda jeńildik jasalady.
Al aldaǵy jyldan bastap jan-janýarlarǵa qamqorlyq kórsetetin jáne qaiyrymdylyq jasaýmen ainalysatyn uiymdarǵa memleket tarapynan naqty qoldaý bolmaq. Anyqtap aitqanda, osyndai uiym qurǵan belsendi azamattar uiymǵa qajetti keńse nemese baspanany jeńildikpen alady.
Dalanews.kz tilshisi osy oraida «Shapaǵat» úkimettik emes uiymynyń tóraǵasy, ekobelsendi Marǵulan Madiiarovtan pikir suraǵan bolatyn.
«Eriktiler týraly, qaiyrymdylyqqa qatysty jáne úkimettik emes uiymdardyń jumysymen bailanysty zańǵa birqatar ózgerister engeli otyr. Osy salada úzdik nátije kórsetken, eńbeginiń jemisin jep, elge, qoǵamǵa paidasyn tigizgen tulǵalar memleket tarapynan marapattalatyn boldy. Bul elimizdegi eriktiler jumysyna serpin bereri sózsiz», – deidi sarapshy.
Jańa talapqa sai elimizdegi qaiyrymdylyq uiymdary jylyna bir ret óziniń kiristeri men shyǵystary týraly esep beredi. Esep-qisap týraly málimetteri mundai uiymdar óziniń resmi saitynda nemese aqparat quraldarynda jariialaýy tiis. Sarapshylardyń pikirinshe, prezident Toqaev shildeniń basynda qol qoiǵan qujat qyrkúiekten bastap kúshine enedi.
Atalǵan zań Májilis minberinde qyzý talqylanyp, qujattyń artyq-kem tusy tarazyǵa tartylǵan bolatyn. Depýtat Vera Aleksandrovanyń (Kim) aitýynsha, zańdy talqylaýǵa osy salanyń bilgir mamandary atsalysqan.
«Qoǵam belsendileri, eriktiler, ekobelsendiler, úkimettik emes qurylymdar jáne qaiyrymdylyqpen ainalysatyn uiymdardyń ókilderimen 20-dan asa kezdesý ótkizdik. Olardyń usynystaryn tyńdadyq, jańa zań sonyń negizinde jazyldy. Eshkimdi shet qaldyrǵan joqpyz, qujatty tolyq pisirip, kem-ketigin túzep, qoǵamǵa qyzmet etetin maqsatta ázirledik. Eshkimniń pikiri eskerilmei qalǵan joq. Jańa zańǵa enetin ózgerister ilgeridegi salalardyń tamyryna qan júgirtedi dep senemiz», – deidi májilismen.
Aita ketelik, búginde Májiliste otyrǵan Vera Kim eńbek jolyn erikti retinde bastaǵan edi. Búginderi ol "Ulttyq eriktiler jelisi" uiymynyń tóraǵasy. Uiym 60-ǵa jýyq volonterlik mekemelerdi biriktirip otyr.
