قىركۇيەك ايىندا ۆولونتەرلىك قىزمەتكە قاتىستى جاڭا زاڭ كۇشىنە ەنەدى دەپ كۇتىلۋدە. ونىڭ باستى ەرەكشەلىگى – قوعامدىق ماڭىزى باس ىسكە اتسالىسىپ، كومەگىن كورسەتۋدەن تايىنبايتىن ەرىكتىلەرگە مەملەكەتتىك قىزمەتكە تۇراردا جەڭىلدىك جاسالادى.
ال الداعى جىلدان باستاپ جان-جانۋارلارعا قامقورلىق كورسەتەتىن جانە قايىرىمدىلىق جاساۋمەن اينالىساتىن ۇيىمدارعا مەملەكەت تاراپىنان ناقتى قولداۋ بولماق. انىقتاپ ايتقاندا، وسىنداي ۇيىم قۇرعان بەلسەندى ازاماتتار ۇيىمعا قاجەتتى كەڭسە نەمەسە باسپانانى جەڭىلدىكپەن الادى.
Dalanews.kz ءتىلشىسى وسى ورايدا «شاپاعات» ۇكىمەتتىك ەمەس ۇيىمىنىڭ ءتوراعاسى، ەكوبەلسەندى مارعۇلان مادياروۆتان پىكىر سۇراعان بولاتىن.
«ەرىكتىلەر تۋرالى، قايىرىمدىلىققا قاتىستى جانە ۇكىمەتتىك ەمەس ۇيىمداردىڭ جۇمىسىمەن بايلانىستى زاڭعا ءبىرقاتار وزگەرىستەر ەنگەلى وتىر. وسى سالادا ۇزدىك ناتيجە كورسەتكەن، ەڭبەگىنىڭ جەمىسىن جەپ، ەلگە، قوعامعا پايداسىن تيگىزگەن تۇلعالار مەملەكەت تاراپىنان ماراپاتتالاتىن بولدى. بۇل ەلىمىزدەگى ەرىكتىلەر جۇمىسىنا سەرپىن بەرەرى ءسوزسىز»، – دەيدى ساراپشى.
جاڭا تالاپقا ساي ەلىمىزدەگى قايىرىمدىلىق ۇيىمدارى جىلىنا ءبىر رەت ءوزىنىڭ كىرىستەرى مەن شىعىستارى تۋرالى ەسەپ بەرەدى. ەسەپ-قيساپ تۋرالى مالىمەتتەرى مۇنداي ۇيىمدار ءوزىنىڭ رەسمي سايتىندا نەمەسە اقپارات قۇرالدارىندا جاريالاۋى ءتيىس. ساراپشىلاردىڭ پىكىرىنشە، پرەزيدەنت توقايەۆ شىلدەنىڭ باسىندا قول قويعان قۇجات قىركۇيەكتەن باستاپ كۇشىنە ەنەدى.
اتالعان زاڭ ءماجىلىس مىنبەرىندە قىزۋ تالقىلانىپ، قۇجاتتىڭ ارتىق-كەم تۇسى تارازىعا تارتىلعان بولاتىن. دەپۋتات ۆەرا الەكساندروۆانىڭ (كيم) ايتۋىنشا، زاڭدى تالقىلاۋعا وسى سالانىڭ بىلگىر ماماندارى اتسالىسقان.
«قوعام بەلسەندىلەرى، ەرىكتىلەر، ەكوبەلسەندىلەر، ۇكىمەتتىك ەمەس قۇرىلىمدار جانە قايىرىمدىلىقپەن اينالىساتىن ۇيىمداردىڭ وكىلدەرىمەن 20-دان اسا كەزدەسۋ وتكىزدىك. ولاردىڭ ۇسىنىستارىن تىڭدادىق، جاڭا زاڭ سونىڭ نەگىزىندە جازىلدى. ەشكىمدى شەت قالدىرعان جوقپىز، قۇجاتتى تولىق ءپىسىرىپ، كەم-كەتىگىن تۇزەپ، قوعامعا قىزمەت ەتەتىن ماقساتتا ازىرلەدىك. ەشكىمنىڭ پىكىرى ەسكەرىلمەي قالعان جوق. جاڭا زاڭعا ەنەتىن وزگەرىستەر ىلگەرىدەگى سالالاردىڭ تامىرىنا قان جۇگىرتەدى دەپ سەنەمىز»، – دەيدى ماجىلىسمەن.
ايتا كەتەلىك، بۇگىندە ماجىلىستە وتىرعان ۆەرا كيم ەڭبەك جولىن ەرىكتى رەتىندە باستاعان ەدى. بۇگىندەرى ول "ۇلتتىق ەرىكتىلەر جەلىسى" ۇيىمىنىڭ ءتوراعاسى. ۇيىم 60-عا جۋىق ۆولونتەرلىك مەكەمەلەردى بىرىكتىرىپ وتىر.
