«Erlik elge – mura, urpaqqa – úlgi»  degen halyq danalyǵy tegin aıtylmasa kerek. Osydan on jyl buryn Taraz qalasynda qarýly lańkesti ustaý kezinde erlikpen qaza tapqan polısıa qyzmetkeri Ǵazız Baıtasovtyń esimin el esinde máńgilikke saqtaý maqsatynda elimizde kóptegen sharalar atqaryldy.

Batyr ulǵa «Halyq qaharmany» ataǵy berilip, jer-jerlerde Ǵ. Baıtasovqa arnalǵan eskertkish taqtalar ashyldy.

Búgin atalǵan oqıǵanyń 10 jyldyǵyna oraı Maqan Esbolatov atyndaǵy Almaty akademıasynda «Halyq qaharmany»  Ǵazız Baıtasovqa arnalǵan buryshtama taqta (stend)  ashylyp, oǵan batyrdyń jubaıy arnaıy shaqyryldy.

Almaty akademıasynyń bastyǵy Aıdar Saıtbekovtiń quttyqtaý sózinen soń, akademıa bastyǵy men marqumnyń jubaıy Gúljamal Mahambetqyzy buryshtama taqtany saltanatty túrde ashty.

Jańa ashylǵan buryshtamaǵa orkestr áýenimen gúl qoıý rásimin ótkizgen soń, Ǵazız Baıtasovtyń jubaıy Gúljamal Mahambetqyzyna akademıa ǵımaratynda ekskýrsıa uıymdastyrylyp, klýbta oqytýshy-professorlyq qurammen, kýrsanttarmen kezdesý ótkizildi.

Ǵazız Baıtasovtyń erligi jaıly  derekti fılm kórsetildi. «Erdiń ózi ólse de, aty ólmeıdi» degenniń ras ekeni taǵy bir ret dáleldendi. Batyr áriptesimizdiń aty máńgi jasaı bermek.