Eýropa qazaqstandyqtarǵa viza berý tártibin jeńildetýi múmkin, – dep habarlaidy Dalanews.kz.
Qazaqstan Prezidenti Eýropa Odaǵynyń Syrtqy ister jáne qaýipsizdik saiasaty jónindegi Joǵarǵy ókili – Eýropalyq komissiianyń vitse-prezidenti Kaia Kallaspen kezdesti.
Kezdesýde Qazaqstannyń Eýropa Odaǵymen san qyrly yqpaldastyǵynyń perspektivasy talqylandy.
Saýda-ekonomikalyq yntymaqtastyqtyń mańyzdy baǵyttaryna, atap aitqanda, energetika, ónerkásip, tsifrlandyrý, sondai-aq, Transkaspii halyqaralyq kólik dálizin damytýdy kózdeitin iri infraqurylymdyq jobalardy júzege asyrý máselelerine erekshe mán berildi.
Kaia Kallastyń aitýynsha, Qazaqstan - Eýropa Odaǵymen seriktestik jáne yntymaqtastyq jónindegi kelisimge qol qoiǵan aimaqtaǵy alǵashqy elderdiń biri. Bul ekijaqty qarym-qatynastyń deńgeii joǵary ekenin kórsetedi.
Ol Eýropalyq komissiia men Qazaqstan arasynda viza berý tártibin jeńildetý jónindegi kelisimdi bekitý úderisi bastalǵanyn málimdedi.
Memleket basshysy qazaqstandyqtar bul jańalyqty óte jyly qabyldaǵanyn atap ótip, bul qadam eýropalyq eldermen jeke jáne iskerlik qatynastardy nyǵaitýǵa mol múmkindik beretinin aitty.
Qasym-Jomart Toqaev pen Kaia Kallas halyqaralyq jáne óńirlik kún tártibindegi ózekti taqyryptar jóninde pikir almasty.
Memleket basshysy jahandyq turaqsyzdyqty eskere otyryp, álemde bolyp jatqan kúrdeli oqiǵalarǵa baǵa berýde baiyptylyq pen jaýapkershilik tanytýdyń airyqsha mańyzǵa ie ekenin aitty.
Prezidenttiń pikirinshe, Qazaqstan barlyq ózekti halyqaralyq máseleler men qaqtyǵystardy diplomatiialyq kelissózder arqyly sheshýdi berik ustanady.
Kezdesýde "Ortalyq Aziia – Eýropa Odaǵy" formatyndaǵy yqpaldastyqtyń jai-kúii qaraldy.
