Májilis depýtaty Ashat Aimaǵambetov uzaq ýaqyt boiy talqylanyp kelgen mańyzdy másele sheshimin tapqanyn jetkizdi, dep habarlaidy Dalanews.kz.
Depýtat máseleni júieli túrde kóterip, úzdiksiz jumys istese, túbinde oń sheshimge qol jetkizýge bolatynyn atap ótti.
"Máselelerdi kezeń-kezeńimen sheshý – eń tiimdi ádisterdiń biri. Keide bir máseleni sheshý úshin usynys jasaisyń, biraq ol birden qoldaý tappaýy múmkin. Osyndai sátterde keibir adamdar beti qaityp, bastamasynan bas tartady. Alaida máseleni qaita-qaita kóterip, birtindep ilgeriletseń, túptiń-túbinde ony tolyq sheshý múmkindigi paida bolady. Mysaly, halyqaralyq ǵylymi baiqaýlardyń jeńimpazdaryna ýniversitetke túsý úshin grant berý jáne birjolǵy aqshalai syiaqy taǵaiyndaý máselesin biz eki jyl boiy kóterdik. Tipti, ashyǵyn aitqanda, ministr bolǵan kezimde tek halyqaralyq olimpiadalardyń jeńimpazdary ǵana emes, ǵylymi jobalardyń da jeńimpazdary osy buiryq jobasyna engizilgen edi. Biraq Qarjy ministrligi qarajat jetpeidi dep qoldamai, sol buiryqpen tek olimpiada jeńimpazdary qamtylǵan edi", - deidi depýtat.
Buǵan deiin halyqaralyq olimpiada jeńimpazdary UBT tapsyrmai-aq grant ielenýge múmkindik alǵan bolatyn. Al endi ǵylymi joba baiqaýlarynyń jeńimpazdaryna da osy jeńildik jasalmaq.
"Sodan keiin, Parlamentte jumysty jalǵastyryp, tiisti túzetýlerdi ázirlep, Úkimetke birneshe ret usyndyq. Alǵashqy talpynystarda qoldaý taba almadyq. Odan keiin usynysymyz jartylai sheshildi: grant bólý máselesi maquldanyp, jýyrda qabyldanǵan zańǵa sáikes, halyqaralyq ǵylymi jobalar baiqaýlarynyń jeńimpazdary endi UBT tapsyrmai-aq grantqa ie bola alady. Biraq aqshalai syiaqy jaǵy taǵy qoldaý tappady. Osydan keiin biz aqshalai syiaqy máselesin qaita-qaita kóterdik. Nátijesinde, mine, ol da sheshimin tapty! Bizdiń Komitettiń otyrysynda halyqaralyq ǵylymi baiqaýlardyń jeńimpazdary men júldegerlerine, sondai-aq olardy daiyndaǵan pedagogtarǵa birjolǵy aqshalai syiaqy berý týraly túzetýler qabyldandy. Endi Jalpy otyrysqa shyǵarylady.
Memleket basshysy Qasym-Jomart Toqaev daryndy balalardy qoldaý týraly birneshe ret aitqan bolatyn, "AMANAT" partiiasy da óz baǵdarlamasynda osy bastamany kótergen edi. Bul ózgerister Prezident aitqandai daryndy balalardy qoldaýdy kúsheitip, elimizdiń bilim berý jáne ǵylym áleýetin nyǵaitýǵa yqpal etedi. Qazaqstannyń jas ǵalymdary álemdik deńgeidegi jańa jetistikterge jetetinine senimdimiz!", - dep jazdy Ashat Aimaǵambetov.
