Májilis depýtaty, “AMANAT” partiiasy fraktsiiasynyń múshesi Ashat Aimaǵambetov jumys oryndaryndaǵy eńbek qaýipsizdigi máselesine nazar aýdardy, dep habarlaidy Dalanews.kz.
Qazaqstanda 2024 jyldyń basynan beri 1 232 óndiristik jaraqat alý jaǵdaiy tirkelip, onyń 251-i adam ólimimen aiaqtalǵan. Depýtattyń aitýynsha, oqiǵalardyń 24%-y eńbek qaýipsizdigi erejeleriniń saqtalmaýynan týyndaǵan.
“Bul jai ǵana statistika emes. Ár sannyń artynda adam ómiri tur. Ákelerinen, analary men uldarynan aiyrylǵan otbasylar bar. Mundai jaǵdailar kezdeisoqtyq emes. Bul – qaýipsizdik erejelerin elemeýdiń tikelei saldary. Eń ókinishtisi, eńbek qaýipsizdigi talaptaryn buzǵandardyń jartysyna jýyǵy tek eskertý alýmen shekteledi. Biraq mundai erejebuzýshylyq adam ólimine ákelse she? Kim jaýap beredi?“, – dedi Aimaǵambetov.
Onyń aitýynsha, osy jaǵdailardy eskere otyryp, jańa zańnamalyq ózgerister engizilgen. Endi eńbek qaýipsizdigi erejelerin buzǵandarǵa naqty ári ádil jaza qarastyrylady.
Negizgi ózgerister:
– Eskertýler tolyq alynyp tastaldy;
– Aiyppul kólemi ósti:
• alǵash ret buzǵandarǵa – 20-dan 120 AEK-ke deiin;
• qaitalanǵan jaǵdaida – 40-tan 240 AEK-ke deiin.
“Bul aiyppulmen aqsha jinaý emes. Bul – ádildik ornatý jáne jumysshylardyń ómirin qorǵaý joly. Adal jumys berýshiler úshin alańdaýǵa negiz joq. Jańa talaptar tek eńbek qaýipsizdigin elemeitinderge qatysty”, – dep atap ótti depýtat.
Aimaǵambetovtyń aitýynsha, bul ózgerister eńbek jaǵdailaryn jaqsartyp, jumysshylardyń qaýipsizdigin qamtamasyz etýdi maqsat etedi. Qaýipsizdik erejelerin elemeitinder endi zań aldynda jaýap bermek.
