Astana men Almaty kóshelerindegi aqyly turaqtar endi jeke kompaniialardyń ieliginde bolmaidy. Bul týraly Májilis depýtaty Baqytjan Bazarbek óziniń Facebook paraqshasynda jazdy, dep habarlaidy Dalanews.kz
Depýtattyń aitýynsha, Qurylys kodeksi jobasyn talqylaǵan jumys toby onyń Jer kodeksiniń 109-babyna engizgen túzetýin qoldaǵan. Bul túzetý eki qaladaǵy jeke ieliktegi aqyly turaqtardy alyp tastaýǵa baǵyttalǵan.
«Almatyda oligarhtar firma-prokladka quryp, halyqtan turaq aqysy arqyly aqsha jinady. Qalanyń biýdjeti milliardtaǵan teńgeden aiyryldy, kináliler sottaldy, biraq júie toqtaǵan joq. Almatyda da, Astanada da jalǵasa berdi. Halyq tólep jatqanda, bireýler sol aqshamen baiyp otyrdy», — dep jazdy Bazarbek.
Onyń sózinshe, bul tájiribe qyzmet emes, taza qarjylyq shemaǵa ainalǵan.
Baqytjan Bazarbek endi ákimdikterge jol jiegindegi bos keńistikterdi jeke tulǵalarǵa nemese kompaniialarǵa aqyly turaq úshin ýaqytsha paidalanýǵa berýge tyiym salynatynyn málimdedi.
«Endi Almaty men Astanadaǵy turaqtarǵa tólengen barlyq qarajat jeke qaltalarǵa emes, jergilikti biýdjetke túsetin bolady. Bul – halyqtyń múddesin qorǵaýǵa baǵyttalǵan ádil sheshim», — dedi depýtat.
Túzetýdi Májilis depýtattary Mýrat Abenov, Marhabat Jaiymbetov, Dúisenbek Turǵanov, Lúkbek Tumashinov, Qudaibergen Býksultanov, Ermurat Bapi, Nurgúl Taý, Danabek Isabekov, Ádil Jubanov, Unzila Shapak jáne Dinara Naýmova qoldady.
Baqytjan Bazarbektiń aitýynsha, bul bastama qoǵamdaǵy áleýmettik ádilettilikti qalpyna keltirýge baǵyttalǵan.
«Daǵdarys kezinde halyqtyń esebinen baiý — qoǵamǵa qarsy qylmys. Biz bul júiege núkte qoiamyz. Ádiletsiz aqyly turaq júiesi tolyq joiylady», — dep túiindedi ol.
