Merekelik is-shara bastalar aldynda Mádeniet jáne sport ministri Ashat Oralov jinalǵan qonaqtarǵa, kórnekti mádeniet qairatkerleri men shyǵarmashylyq ziialy qaýym ókilderine, Memleket basshysy Qasym-Jomart Toqaevtyń quttyqtaý hatyn oqydy.
Kontserttik baǵdarlamaǵa elimizdiń óńirlerinen kelgen 24 shyǵarmashylyq ujym ókilderi qatysty. Hor ujymdary, orkestrler, virtýoz aspapshylary, opera jáne halyq ánshileri ataqty skripkashy, dirijer jáne kompozitor, Qazaqstan Respýblikasynyń eńbek sińirgen qairatkeri Marat Bisenǵalievtiń «Uly dala áýeni» atty odasyn birge oryndady.
Otandyq mádeniet jáne óner qyzmetkerlerine arnalǵan aýqymdy týyndy ulttyq jáne klassikalyq mýzykany úilestirgen. Tyńdaýshylar áserge toly tanys áýenderdi jańa nusqada tamashalai aldy.
Kontserttik baǵdarlama aiaqtalǵannan keiin Ashat Oralov sahnada óner kórsetken artister men shyǵarmashylyq ujymdardyń jetekshilerine alǵys hat tabystady.
«Mádeniet jáne óner qyzmetkerleri kúnine arnalǵan is-sharalar aptalyǵyn laiyqty túrde aiaqtadyq dep oilaimyn. Bizdiń bastamamyzdy qoldaǵandardyń barlyǵyna jáne Memlekettik opera jáne balet teatrynyń sahnasynda óner kórsetýge shaqyrýdy qabyldaǵan shyǵarmashylyq ujymdarǵa rahmet aitqym keledi. Osy jobaǵa qoldaý bildirip, qatysqany úshin Marat Beisenǵalievke erekshe alǵys. Ministrligimiz mádeniet pen óner salasyn damytý jáne qoldaý baǵytyndaǵy jumysty jalǵastyrady. Aldaǵy ýaqyta belgilengen naqty tapsyrmalardy sizdermen birge oryndai alatynymyzǵa kúmánim joq»,- dedi QR Mádeniet jáne sport ministri Ashat Oralov.
Bir apta boiy elimiz boiynsha kontsertter, kórmeler, dóńgelek ústelder jáne basqa da barlyǵy 100-den astam is-shara ótti. Sondai — aq, 300 mádeniet qyzmetkeri «Mádeniet salasynyń úzdigi» tósbelgisimen, 2000-y Qurmet gramotalarymen jáne Alǵys hattarmen marapattaldy. Ashat Oralov búgingi kontsert merekelik is-sharalardyń keremet kýlminatsiiasy bolǵanyn jáne osyndai keshter budan bylai jaqsy dástúrge ainalatynyna senim bildirdi.
