Osy jáne alǵashqy jartyjyldyqtaǵy jumystyń ózge de nátijeleri týraly onlain-brifingte Nur-Sultan qalasynyń jumyspen qamtý jáne áleýmettik qorǵaý basqarmasy basshysynyń orynbasary Erlan Júsipov aityp berdi.
Elordanyń halyqty jumyspen qamtý ortalyǵy arqyly qamtylǵan 5 584 adamnyń 2 804-i turaqty jumys oryndaryna ornalastyryldy, onyń 1 120-y – jastar.
Taǵy 2 046 adam qoǵamdyq jumystarǵa, 270-i – jastar praktikasyna, 128-i – áleýmettik jumys oryndaryna, 39-y – «birinshi jumys orny» jobasy boiynsha, 10-y – «kúmis jas» jobasy boiynsha jumysqa ornalastyryldy.
Jumys berýshilerdiń suranysy boiynsha qysqa merzimdi kýrstardan 129 elorda turǵyny ótip jatyr, skills.enbek.kz portaly arqyly onlain-oqytý 232 adamǵa arnalǵan.
Sonymen qatar, jańa biznes-ideialardy iske asyrý úshin memlekettik grantty bes adam aldy. Sol siiaqty qalada múgedektigi bar adamdar úshin arnaiy jumys oryndary uiymdastyrylady.
«Jyl sońyna deiin 28 000 jumys ornyn qurý josparlanyp otyr, onyń ishinde 17 000-i – turaqty, 11 000-y – ýaqytsha jumys orny (Ulttyq jobalardy iske asyrý aiasynda – 14 180, jeke bastamalar aiasynda – 14 098). 1 shildedegi jaǵdai boiynsha 12 390 jumys orny quryldy. Enbek.kz portalynda jumys istep turǵan 7 myńnan astam bos jumys ornyn 1 000-ǵa jýyq jumys berýshi jariialady», - dedi E.Júsipov.
Búgingi tańda Ulttyq statistika biýrosynyń derekterine sáikes 2022 jyldyń 1 toqsanynyń qorytyndysy boiynsha elordada jumyssyzdyq deńgeii 4,6%-dy quraidy, bul respýblikalyq kórsetkishten 0,3%-ǵa tómen (QR boiynsha – 4,9%).
«Búgingi tańda halyqty jumyspen qamtý ortalyǵynda tirkelgen jumyssyzdar sany 4 873 adamdy quraidy, onyń ishinde jastar sany – 1 249. Sol siiaqty 2 myńnan astam adam (2 147) jumysynan aiyrylý boiynsha áleýmettik tólemderdi alýshylar bolyp sanalady jáne 2 247 adam jumyspen qamtýdyń belsendi sharalaryna qatysady. Jumys izdep júrgen taǵy 479 adam bar», - dedi basqarma basshysynyń orynbasary.
Ol sondai-aq jastarǵa, naqtyraq aitqanda, elordanyń joǵary oqý oryndary men kolledjderiniń túlekterine «jastar praktikasy», «alǵashqy jumys orny», «urpaqtar kelisimsharty» jobalaryna belsendi qatysýǵa shaqyrdy. Sebebi bul tájiribe jinaýǵa, resmi eńbek ótilin alýǵa jáne óziniń básekege qabilettiligin dáleldeýge tamasha múmkindik. Osyǵan deiingi tájiribe kórsetkendei, atalmysh jobalarǵa qatysqannan keiin óz qabiletin kórsetken jastardyń kópshiligi turaqty oryndarǵa jumysqa ornalasady.
