Bul júie bizdiń elimizde 2020 jyldyń 1 qańtarynan iske qosylady.
Qazirgi tańda turǵyndar arasynda, sondai-aq jumys berýshi uiymdar arasynda aqparattyq túsindirý is-sharalary jalǵasýda.
Budan bólek, «Áleýmettik meditsinalyq saqtandyrý qory» kommertsiialyq emes aktsionerlik qoǵamynyń Nur-Sultan qalasy boiynsha filialynyń Halyqty aqparattandyrý jáne ótinishterdi qarastyrý bólimi ár aptanyń dúisenbi kúnderi HQKO-da, juma kúnderi «Nur-Otan» partiiasy» qoǵamdyq birlestiginiń qalalyq filialynda aqparat-keńes berý jumystaryn júrgizedi.
Jýyrda Nur-Sultan qalasy ákiminiń orynbasary B.Máken bekitken arnaiy keste boiynsha memlekettik organdardyń (basqarmalar, meditsina uiymdary, t.b.) qyzmetkerleri úshin mindetti áleýmettik meditsinalyq saqtandyrý júiesin engizý boiynsha aqparattandyrý sharalary uiymdastyryldy.
Qazaqstan Respýblikasynyń Úkimeti 2019 jyldyń 20 maýsymynda № 420 jáne № 421 Qaýlysymen aldaǵy jyly tegin meditsinalyq kómektiń kepildendirilgen kóleminde jáne mindetti áleýmettik meditsinalyq saqtandyrý júiesi (TMKKK jáne MÁMS) boiynsha kórsetiletin qyzmetter tizimin bekitti. MÁMS júiesi iske qosylatyn 2020 jyldyń 1 qańtarynan bastap elorda turǵyndaryna osy eki túrli paket boiynsha meditsinalyq kómek kórsetiledi.
Birinshisi – tegin meditsinalyq kómektiń kepildendirilgen (TMKKK) paketi. TMKKK paketi boiynsha bastapqy meditsinalyq-sanitarlyq kómek azamattardyń bárine, biýdjet esebinen tegin kórsetiledi. Sondyqtan da bul kepildendirilgen standart bolyp sanalady.
TMKKK paketine saqtandyrý júiesindegi mártebesine qaramastan, eldiń barlyq turǵyndaryna qoljetimdi, jedel meditsinalyq kómek jáne sanitariialyq aviatsiia, shuǵyl statsionarlyq kómek, palliativtik kómek engizilgen. Sonymen qatar, áleýmettik mańyzy bar aýrýlar, negizgi sozylmaly aýrýlar kezinde konsýltatsiialyq-diagnostikalyq kómek, ambýlatoriialyq dári-dármekpen qamtamasyz etý, josparly jáne statsionarlyq kómek, sondai-aq meditsinalyq ońaltý qoljetimdi bolady.
Ekinshisi – mindetti áleýmettik meditsinalyq saqtandyrý (MÁMS) paketi.
MÁMS paketine baǵasy qymbat operatsiialar, sirek meditsinalyq qyzmet túrleri, salalyq mamandardyń qabyldaýy, t.b. syndy qyzmetter kiredi. Ony meditsinalyq saqtandyrylǵan azamattar ǵana paidalana alady.
MÁMS paketine TMKKK sheńberinde emdeý jaǵdailaryn qospaǵanda, konsýltatsiialyq-diagnostikalyq kómek, onyń ishinde qymbat turatyn zerthanalyq qyzmetter, TMKKK-den tys ambýlatoriialyq dári-dármekpen qamtamasyz etý, statsionardy almastyratyn kómek jáne josparly statsionarlyq kómek, meditsinalyq ońaltý jáne qalpyna keltirý emi engizilgen.
Búgingi tańda jekelegen meditsinalyq qyzmetterdi alý úshin zańnamamen azamattardyń áleýmettik jaǵynan osal 8 sanaty anyqtaldy, onyń ishinde balalar, júkti, kóp balaly analar, zeinetkerler jáne t. b.
2020 jyldan bastap MÁMS engizý kezinde zańmen 15 jeńildik sanattaǵy azamattar anyqtaldy. Bul tulǵalardy (olardyń sany shamamen 10,9 mln adamdy quraidy) memleket saqtandyrady.
Turǵyndar densaýlyǵyn saqtaýdaǵy mańyzdy salanyń biri – bastapqy meditsinalyq-sanitarlyq kómek, iaǵni, elordalyqtar qaralatyn emhanalar, sondyqtan osy salaǵa basymdyq beriledi.
«Bastapqy meditsinalyq kómektiń sapasy men qoljetimdiligin qamtamasyz etý maqsatynda Nur-Sultan qalasynda emhanalardyń júktemelerin azaitýǵa baǵyttalǵan is-sharalardyń kartografiiasy jasaldy. Nátijesinde, 2019 jyldyń sońyna deiin qala mańynda turatyn 100 myńnan astam turǵyndar ózi turatyn úiden 20 metr qashyqtyqta ornalasqan emhanalarmen qamtamasyz etiledi.
Buǵan jekemenshik investorlardyń kómegimen jańa emhanalar, dárigerlik ambýlatoriialar ashý arqyly qol jetkizýge bolady. Bolashaqta emhana qyzmeti – meditsina salasynyń básekelestik alańyna ainalary sózsiz. Al, básekelestik bar jerde, kez kelgen qyzmettiń sapasy artady, - deidi «Áleýmettik meditsinalyq saqtandyrý qory» KEAQ Nur-Sultan qalasy boiynsha filialynyń direktory Nurlybek Qabdyqaparov.
Aita keteiik, Meditsinalyq saqtandyrý qorynyń Nur-Sultan qalasy boiynsha filialymen kelisimshartqa otyryp, tapsyrys alyp jatqan, sonyń ishinde emhana qyzmetine qyzyǵýshylyq tanytyp otyrǵan jekemenshik klinikalar sany artyp keledi. Biylǵy jyly elordalyqtarǵa memlekettik tapsyrys aiasynda meditsinalyq qyzmet kórsetý úshin Qormen kelisimshart bekitken 95 meditsinalyq uiymnyń 60-y jekemenshik.
MÁMS engizý sheńberinde meditsinalyq qyzmetterdiń qoljetimdiligi keńeiedi, jekemenshik klinikalardy tartý arqyly básekelestik nátijesinde, halyqqa kórsetiletin meditsinalyq qyzmet sapasy artady.
Búgingi kúnniń ózinde elordamyzdaǵy emhanalar "Astana — adaldyq alańy" jobasy aiasynda dárigerlerdiń qabyldaýyna smart-qosymsha nemese biryńǵai call-ortalyq - 109 arqyly aldyn ala jazylý arqyly "kezeksiz" jumys rejimine kóshti.
Emhana nemese tikelei dáriger týraly tilekter men pikirlerdi Smart Astana mobildik qosymshasy arqyly qaldyrýǵa bolady. Ol úshin uialy telefonǵa arnaiy QR-kodty skanerleý jetkilikti.
Aqparattyq kiosk pen smart-qosymshadaǵy barlyq aqparat, sonyń ishinde shaǵymdar, dárigerlerdiń jumysyn baǵalaý qoǵamdyq densaýlyq saqtaý basqarmasynyń ahýaldyq ortalyǵynda jinalady, bul kórsetiletin meditsinalyq kómek deńgeiin taldaýǵa jáne sapany jaqsartý úshin sharalar qabyldaýǵa múmkindik beredi.
Biz sózben aitqanda, elimizdegi, elordamyzdaǵy emdeý mekemeleri meditsinalyq saqtandyrý júiesi boiynsha jumys júrgizýge jumyldyrylýda.
«Áleýmettik meditsinalyq saqtandyrý qory» KEAQ
Nur-Sultan qalasy boiynsha filialynyń
baspasóz qyzmeti
