Rıo Qazaqstan úshin tuńǵyshtar olımpıadasy bolyp tur. Kúni keshe aýyr atlet Jazıra Japarqul 69 kelide kúmis medal ıelenip, qazaq qyzdary arasynan shyqqan tuńǵysh olımpıada júldegeri atanyp edi. Keshe túnde Elmıra Syzdyqova áıelder kúresinen 69 kelide qoladan olja salyp, qazaq qyzdary arasynan kúresten júldeger atanǵan tuńǵysh balýan bolyp tarıhqa endi dep habarlaıdy statsport.kz saıty.
Elmıra olımpıadanyń betashar beldesýinde Natalá Vorobevadan (Reseı) utyldy. Árıne,birden olımpıada chempıonyna tap kelý ońaı emes. Vorobeva fınalǵa shyqqasyn, Syzdyqova jubanysh beldesýinde baq synaýǵa múmkindik aldy. Nasanbýrnaa Ochırbatty (Mońǵolıa) jeńip, ol qola júlde úshin mysyrlyq Enas Mustafa Iýssef Ahmedpen beldesti. Áýeli 1 upaı berip qoıyp, İ kezeń aıaqtalar tusynda Elmıra qarsylasyn jambasqa aldy — 4:1. İİ kezeń basynda Ahmed esepti teńestirgende de qarakóz qyz bosańsyǵan joq. Ahmedtiń ádisin ózine qarsy qoldanyp tý syrtyna shyǵyp ketip, astyna basyp úlgerdi de, taǵy 3 upaı oljalady. Sóıtip, Syzdyqova tóreshi ysqyryǵyn jeńimpaz retinde estidi.
Elmıra Syzdyqova — áıelder kúresinen Qazaqstanǵa júlde ákelgen úshinshi balýan qyz. Oǵan deıin Elena Shalygına (2008) jáne Gúzel Manúrova (2012) olımpıadalardyń qola júldesin jeńip aldy.
Keshe boksshy Darıǵa Shákimova da (75 keli) jartylaı fınalǵa shyqty. Qandaı medal alsa da, ol olımpıada júldegeri qataryna kirgen tuńǵysh boksshy qazaq qyzy bolmaq.